Governu Aprova Regulamentu Aplikasaun Kódigu Aprovizionamentu no Kontratu Públiku

Reuniaun Konsellu Ministru iha Palásiu Governu. Imajen/Dok.Média PM

DILI, RAFA.tl – IX Governu Konstitusionál, liu husi Reuniaun Konsellu Ministru iha Palásiu Governu, Díli, Segunda (22/12/2025), aprova projetu Dekretu Governu nian, ne’ebé aprezenta hosi Ministra Finansas, Santina José Rodrigues F. Viegas Cardoso, kona-bá Regulamentu ba aplikasaun Kódigu Aprovizionamentu no Kontratu Públiku sira no vizaun jerál kona-bá enkuadramentu legál ba kontratasaun públika iha Timor-Leste.

Iha komunikadu ofisiál ne’ebé Rafa.tl asesa husi Gabinete Mídia Primeiru-Ministru Kay Rala Xanana Gusmão hatete, dokumentu sira ne’ebé aprova tuir Dekretu Governu ida-ne’e elabora ho objetivu atu apóia funsionáriu públiku, jestór akizisaun no interveniente sira seluk iha prosesu kontratasaun públika, hodi fó ba sira orientasaun ida ne’ebé klaru kona-bá implementasaun enkuadramentu jurídiku foun ne’ebé estabelese hosi Dekretu-Lei nú. 1/2025, loron 8 fulan-Janeiru, ne’ebé aprova Kódigu Aprovizionamentu no Kontratus Públikus.

Regulamentu no vizaun jerál ne’e fó rezumu objetivu ida kona-bá dispozisoins prinsipál sira ne’ebé Kódigu foun introdús, hodi destaka ninia prinsípiu estruturante sira no fó detalle kona-bá métodu kontratasaun ne’ebé sei adota, hodi bele garante transparénsia, efisiénsia no preferénsia ba fornesedór nasionál sira iha selebrasaun kontratus públikus.

Dokumentu sira ne’e sei disponível iha Portál Aprovizionamentu nian, iha lian ofisiál sira no ho tradusaun sira ba lian traballu nian, no aplika ba kontratus públikus akizisaun ka lokasaun (aluga) beins, akizisaun servisu ka ezekusaun obras nian, ho hanoin atu hatán ba nesesidades servisu no entidade sira nian iha Setór Públiku Administrativu.

Konsellu Ministru aprova mós projetu Dekretu Governu, ne’ebé aprezenta hosi Ministra Finansas, ne’ebé aprova Dokumentu Padraun Aprovizionamentu nian ne’ebé previstu iha Dekretu-Lei nú. 1/2025, loron 8 fulan-janeiru, kona-bá kódigu Aprovizionamentu no Kontratus Públikus.

Dekretu Governu ida ne’e aprova Dokumentus Padraun Aprovizionamentu nian, ne’ebé organiza iha kategoria tolu ne’ebé keta-ketak — Beins, Servisu no Obras— atu nune’e bele fasilita sira nia aplikasaun tuir natureza hosi kontratu públiku ne’e.

Formuláriu sira ne’ebé presiza ba ezekusaun prosedimentu aprovizionamentu nian sei disponibiliza hosi Ministériu Finansa iha Portál Aprovizionamentu. Servisu no entidades  Setór Públiku Administrativu nian tenke rai sistema rejistu prosedimentu aprovizionamentu nian iha arkivu ba períodu mínimu tinan 10 hahú hosi data rejistu nian.

Iha komunikadu ne’e subliña óos katak Dekretu Governu rua-ne’e tama iha vigór, iha loron 01 fulan-Janeiru tinan 2026.

Reportajen ekipa Rafa.tl