Prezidente Repúblika no Governu Agradese Povu Tomak Ne’ebé Mantein Pás no Estabilidade

Prezidente Repúblika (PR), José Ramos-Horta, konvoka Reuniaun Konsellu Superiór Defeza no Seguransa (KSDS) iha Palásiu Prezidensiál, Segunda (22/12/2025). Imajen/Rafa.tl

DILI, RAFA.tl– Prezidente Repúblika (PR), José Ramos-Horta, Segunda (22/12/2025), konvoka Reuniaun Konsellu Superiór Defeza no Seguransa (KSDS) no hato’o agradesimentu ba povu tomak ne’ebé mantein kria páz no estabilidade iha sosiedade nia leet durante tinan 2025.

Iha reuniaun Konsellu Superiór Defeza no Seguransa ne’e partisipa husi Primeiru-Ministru Kay Rala Xanana Gusmão, Ministru Defesa Donaciano do Rosário da Costa Gomes “Pedro Klamar Fuik”, Ministru Justisa Sérgio de Jesus Fernandes da Costa Hornai, Ministru Interiór Francisco Guterres, Komandante Jerál PNTL Komisáriu Polísia Henrique da Costa, Komandante Jerál F-FDTL, Tenente-Jenerál Domingos Raul Falur Rate Laek, Parlamentu Nasionál no mós membru KSDS sira seluk.

Hafoin enkontru KSDS, Primeiru-Ministru Kay Rala Xanana Gusmão ba Jornalista sira, hato’o agradese ba povu tomak liu-liu joven sira ne’ebé durante tinan 2025 ne’e nafatin kria pás no hakmatek iha sosiedade.

“Prezidente Repúblika agradese  tebes ba  sosiedade tanba apóiu ona pás no domin, ne’ebé akontese no buat ruma iha ne’e ita la foti hanesan obstákulu  boot tanba la óho malu, ne’e duni, nune’e mós ha’u hakarak hato’o katak ambiente hanesan ne’e mak ami hala’o  to’o iha fim do ano. Ita hotu hamutuk kontente hodi haré ba saida mak ita hotu-hotu halo ona iha 2025, hodi bele nune’e presiza kurize, presiza halo buat foun atu lori nafatin rai ne’e ba dalan los,” Primeiru-Ministru Kay Rala Xanana Gusmão hateten.

Iha oportunidade reuniaun Konsellu Superiór Defeza no Seguransa ne’e mós, Primeiru-Ministru Kay Rala Xanana Gusmão hato’o nia Boas Festas Natal e Feliz, 25 Dezembru 2025, Ano Novu, 01 Janeiru 2026, ba povu tomak atu hotu-hotu mantein pás no estabilidade durante selebrasaun Natal no tinan foun.

Iha fatin hanesan, Komandante Jerál PNTL, Komisáriu Jerál Polísia Henrique da Costa, rekoñese iha loron hirak ne’e joven sira hamosu problema iha fatin balun ne’ebé ho kondisaun lanu, maibé parte seguransa foti  kedas atuasaun hodi asegura joven sira hodi halo prosesu identifikasaun.

“Komandu Jerál hasai ona diretiva ba komandu Munisípiu ho Unidade sira, nune’e hala’o atividade hasa’e patrullamentu, atu nune’e prevene ba iha krime no mós problema sira ne’ebé akontese, ne’ebé los duni iha loron hirak ne’e mosu duni tuda malu, sira ne’e tanba lanu, ita nia fatin marka prezensa atu nune’e labele akontese,” Komisáriu Jerál PNTL, Komisáriu Jerál Polísia Henrique da Costa. hateten

Komisáriu Jerál PNTL, nafatin orienta ba Komandu Munisipál atu koloka membru Polísia hodi asegura fatin feira sira ne’ebé loke iha Palásiu Prezidensiál no mós iha fatin seluk.

Komandante Jerál ne’e hatutan, antes ne’e husi PNTL hamutuk ho F-FDTL forma ona ekipa tarefa hodi asegura selebrasaun Loron Natal ho Tinan foun 2026.

“Iha diretiva Konjunta servisu hamutuk ho Polísia ho F-FDTL ita forma ona forsa tarefa konjunta sei kompleta malu para halo atividade movimentu prevensaun nian no mós atuasaun responde ba krime sira ne’ebe mak mosu,” Nia esplika.

Komisáriu Jerál Polísia Henrique da Costa husu ba joven sira atu labele konsumu tua iha dalan públiku, bainhira Polísia identifika sei halo atuasaun. Tanba ne’e ba joven sira povu no ba ema hotu katak, seguransa ne’e iha hotu-hotu nia responsabilidade, la’os Polísia ho F-FDTL de’it mak responsabiliza, maibé ema hotu-hotu nian, tanba ne’e nafatin hatudu kolaborasaun servisu hamutuk, tanba iha eventu sira ba kotuk  hanesan vizita Amu Papa nian  ho atividade barak ne’ebé  selebra la’o ho di’ak. Tanba ne’e husu ba ema hotu tama Natal ho tinan foun hotu-hotu kopera malu, nune’e labele hamosu problema.

Komisáriu Jerál Polísia Henrique da Costa mós lori nia naran hato’o Boas Festa do Santo Natal no Boas Entradas Ano Novu nian ba sosiedade tomak.

Reportajen ekipa Rafa.tl