Governu Sei Realiza Auditória Ba Dívida iha EDTL, E.P

Reuniaun Konsellu Ministru, Kuarta (17/12/2025). Imajen/gov.tl

DILI, RAFA.tl–Governu liu husi reuniaun Konsellu Ministrus, Kuarta (17/12/2025), aprova projetu rezolusaun Governu ne’ebé aprezenta hosi Ministra Finansas, Santina Cardoso ho Ministru Obras Públikas, Samuel Marçal, ne’ebé determina realizasaun auditoria ida ba dívida instituisoins públikas nian ba Eletrisidade Timor-Leste, Empreza Públika (EDTL), no orienta pagamentu parsiál ho montante validadu, hanesan prevee ona iha Orsamentu Jerál Estadu ba tinan 2025.

Iha komunikadu ofisiál ne’ebé Rafa.tl asesu husi Portal Governu hateten desizaun ne’e konsidera ezisténsia hosi dívida ne’ebé akumulada kona-bá fornesimentu enerjia elétrika, ne’ebé kalkula kuaze millaun US$28, fó impaktu ba sustentabilidade finanseira no kapasidade operasionál hosi EDTL, situasaun ne’ebé destaka mós iha relatóriu Kámara Kontas nian.

Rezolusaun Governu determina katak Ministériu Finansas atu realiza auditória ida ne’ebé detallada hodi determina montante loloos ne’ebé tenke selu hosi entidade ida-idak, prevee mós pagamentu, nafatin iha tinan 2025, hosi millaun US$18, ne’ebé inklui ona iha Orsamentu Jerál Estadu nian, nune’e mós definisaun hosi planu fazeadu ida ba likidasaun hosi valor restu ne’e iha tinan sira tuirmai.

Medida ne’e mós estabelese obrigatoriedade ba instituisaun públika sira atu aloka didi’ak despeza sira ne’ebé relasiona ho fornesimentu eletrisidade iha sira-nia orsamentu, atu nune’e, bele evita akumulasaun dívida foun no garante sustentabilidade ba servisus ne’ebé presta hosi EDTL.

Reportajen ekipa Rafa.tl