Tribunál Aplika Medida Koasaun Aprezentasaun Periódika ba Arguidu Tráfiku Ilísitu Droga

Logotipu Tribunál Judisiáriu Primeira Instánsia Dili. Imajen/Rafa.tl

DILI, RAFA.tl– Porta-voz Polísia Sientífiku Investigasaun Kriminál (PCIC, sigla portugés), Mário Francisco da A. Tavares, Sesta (12/12/2025) hatete, PCIC  kumpri mandadu husi Autoridade Judisiáriu hodi halo detensaun ba sidadaun ida ho inisiál SCA iha Kuarta, 10 fulan-Dezembru 2025 tanba deskonfia envolve iha krime tráfiku ilísitu droga.

Hafoin halo detensaun durante oras 72 iha sala detensaun PCIC, ekipa lori kedas arguidu ho inisiál SCA ba Tribunál hodi tuir julgamentu primeiru Interogatóriu no ikus mai Tribunál aplika medida koasaun aprezentasaun Periódika ba Arguidu SCA.

“Horseik, Polísia Sientífiku Investigasaun Kriminál kumpri mandadu detensaun husi autoridade judisiáriu Tribunál Judisiál Primeira Instánsia Dili hasai mandadu hasoru sidadaun Timoroan ida ho inisiál SCA, ne’ebé mak alegadamente iha indisius katak nia envolve iha mídia tráfiku de droga nian. Loron rua liubá, PCIC halo detensaun ba ninia rezidénsia hodi lori mai para kumpri prazu oras 72, ba Primeiru Interogatóriu ba ninia kazu,” Mário Francisco da A. Tavares haktuir ba jornalista sira iha sala PCIC, Colmera, Dili.

Porta-voz PCIC ne’e deklara kona-bá rezultadu  ezaminasaun ba droga ne’e hatudu droga kokaina no antes ne’e iha fulan-Agustu liubá PCIC halo ezame ba droga refere no deskonfia na’in ba droga ne’e Timoroan ida, husi teste refere katak substánsia ne’ebé mak tama mai ne’e tuir lei droga nian hanesan substánsia ilísita, entaun PCIC aprezenta ba Ministériu Públiku no ikus mai prosesu investigasaun la’o, Tribunal ho Ministériu Públiku entende katak tenke hasai mandadu detensaun ba suspeitu refere.

Nia haktuir teste rápidu ne’ebé mak halo iha primeira faze nia pozitivu ba iha kokaina ne’ebé besik kilo ida. Tuir rotan ba sasan Droga Kokaina ne’e mai husi aviasaun nian husi Fransa ba Singapura no mai Timor.

“Ita lori ona ba Primeiru Interogatóriu juíz fó tiha ona medida koasaun ba nia ho Aprezentasaun Periódika ne’ebé kada semana arguidu aprezenta an dala ida ba autoridade Polísia iha Eskuadra ne’ebé nia hela ba,” Nia informa.

PCIC husu ba komunidade sira kona-bá droga substánsia ne’e bele perturba ka estraga ema ninia hanoin no nia efeitu la di’ak ba sosiedade, tanba ne’e ba sosiedade, liu-liu joven sira atu hases an husi atividade sira ne’ebé fásil atu estraga komunidade.

Reportajen ekipa Rafa.tl