PNTL Dili La Tolera Joven Sira Halibur Malu iha Tempu Kalan

Komandante PNTL Munisípiu Dili, Superintendente Xefe Polísia Orlando Gomes. Imajen/Rafa.tl

DILI, RAFA.tl– Komandu Polísia Nasionál Timor-Leste (PNTL) Munisípiu Dili, simu despaixu husi Komandu Jerál PNTL, hodi kontrola seguransa iha Kapitál Dili durante selebrasaun  Natal no tinan foun 2026, no sei la tolera joven sira halibur malu iha tempu kalan.

Komandante PNTL Munisípiu Dili, Superintendente Xefe Polísia Orlando Gomes, ba jornalista sira iha eskuadra Polísia Dom Aleixo, Dili, Kinta (11/12/2025), husu ba joven sira atu labele halibur malu ho grupu iha tempu kalan hahú husi oras 22:00 ba leten.

“Komandu Munisípiu Dili hakarak apela ba sidadaun sira iha kapitál Dili, liu-liu  ba joven sira katak, Natal besik dau-daun, prepara an, maibé komandu husu para labele tur grupu iha estrada, hemu-tua iha Estrada-ibun, nune’e labele provoka  sidadaun seluk ninia liberdade, tanba ne’e ita avizu no apela nafatin  ba joven sira,  liu ona tuku 22:00 OTL, idak-idak tenke hakmatek iha ninia fatin, se hakarak halo servisu movimentu, maibé labele forma grupu iha bairru sira ka iha estrada ninin, iha fatin ne’ebé mak estrada públiku, evita para labele akontese, avizu mak la rona ami sei halo kapturasaun,” Superintendente Xefe Polísia Orlando Gomes hateten.

Nia hatutan, Komandu Polísia Munisípiu Dili sei halo ekipa ida atu bele halo komunikasaun nafatin ho joven sira ne’ebé tur grupu hamutuk iha estrada ninin  ka hemu-tua iha estrada ninin hodi fó avizu ba sira,  katak liu ona tuku 22:00 OTL labele tur tan iha estrada ninin ka hemu iha estrada ninin.

Superintendente Xefe Polísia ne’e mós informa katak, Polísia Tránzitu Munisípiu Dili sei pasa revista iha tempu kalan ba arma branka no mós ba transporte nia dokumentu.

“Seksaun Tránzitu Rodoviáriu mós halo nafatin auto-stop ka chek point iha tempu kalan para bele halo pasa revista ba sasán kro’at sira ne’ebé mak ita-nia motorista sira lori, ita sei prende hotu,” nia afirma.

Superintendente Xefe Polísia Orlando Gomes esplika, Komandu Polísia Munisípiu Dili fó ona orientasaun ba  Polísia Eskuadra Na’in Feto, Vera Kruz, Kristu Rei ho Dom Aleixo, ne’ebé sei reforsa husi Task Force, Batallaun Ordem públika (BOP)  Unidade Polísia Marítima (UPM)  ho forsa rezerva sira, halo patrullamentu la’o ain no mós ho  karreta halo vizilánsia  tama sai bairru sira ne’ebé  mosu bei-beik konflitu.

Reportajen ekipa Rafa.tl