Polísia Tránzitu Nasionál Rejista Asidente Tráfegu 1.870 no Na’in-86 Lakon Vida

Diretór Tránzitu Seguransa Rodoviária Nasionál, Superintendente Xefe Polísia António Mauluta. Imajen/Rafa.tl

DILI, RAFA.tl- Diretór Tránzitu Seguransa Rodoviária Nasionál, Superintendente Xefe Polísia António Mauluta, informa durante fulan-Janeiru to’o fulan-Outubru tinan 2025, Polísia Tránzitu Nasionál rejista asidente tráfegu hamutuk 1.870. Husi númeru ne’e, ema na’in-86 lakon vida.

Polísia Tránzitu Nasionál rejista asidente sira hanesan, lakon vida na’in-86,  ema kanek kaman na’in-158, kanek grave iha ema na’in-332. Husi kazu hira ne’e, investigasaun finál 25, sei iha hela faze investigasaun hamutuk 970 no ba ona Tribunál hamutuk 71  ho mós  kazu 804 rezolve família.

Iha kazu asidente únika ne’ebé komete husi pesoál sira  monu rasik ho motór iha kazu 25. Diretór Polísia Tránzitu Seguransa Rodoviária Nasionál,  Superintendente Xefe Polísia, António  Mauluta, ba jornalista sira iha Komandu Jerál PNTL, Caicoli, Dili, Kuarta (26/11/2025) hateten, bazeia ba rekapitulasaun dadus sira mai husi  Komandu Munisípiu sira rejistu husi  fulan-Janeiru to’o fulan-Outubru, tinan ne’e, kazu asidente hamutuk 1.870.

“Iha  asidente sira ne’e ita halo avaliasaun  husi kazu sira ne’e, ne’ebé mak ita haré ás liu mak husi fatór umanu, kobre 85%, ita haré fali fatór kondisaun karreta no motór  la di’ak, ida ne’e 5%, fatór estrada 5%, no mós fatór natureza 5%,” Superintendente Polísia António Mauluta haktuir.

Nia hateten, haré ba  númeru fatór umanu ne’ebé kontribui maka’as ba iha asidente, ho nune’e mak  Diresaun Tránzitu Seguransa Rodoviária Nasionál, agora servisu hamutuk ho Diresaun Nasionál Transporte no Terrestre (DNTT), halo sensibilizasaun kona-bá tránzitu iha Munisípiu Baucau , Manufahi, Ermera ho Covalima .

“Sensibilizasaun ita halo ne’e ba iha joven sira, ba ita nia estudante sira ne’ebé husi nível sekundária no mós ba iha ita nia moptorista sira, atu uza transporte ho  disiplina iha Estrada públiku,” nia informa.

Iha sensibilizasaun ne’e mós esplika kona-bá sinais tránzitu liu-liu atu esplika ba joven sira no mós ba motorista sira liga ba sinais tránzitu veritikál no orizontál no ba iha regra semáforu nian.

Diretór PolTranz  António Mauluta hatutan, programa sensibilizasaun ba joven, estudante sira sekundária no motorista sira ba iha lei seguransa Rodoviária ne’e sei kontinua hodi nune’e ema bele utiliza motór no karreta  ho kuidadu.

Reportajen ekipa Rafa.tl