PNTL ho F-FDTL Garante Seguransa Másimu iha Komemorasaun Proklamasaun Independénsia ba Dala-50

Porta-voz PNTL, Superintendente Polísia João Belo dos Reis. Imajen/Rafa.tl

DILI, RAFA.tl – Porta-voz Komandu Jerál Polísia Nasionál Timor-Leste (PNTL), Superintendente Polísia João Belo dos Reis hateten,  ekipa konjunta liu husi forsa Tarefa PNTL ho  FALINTIL- Forsa Defeza Timor-Leste (F-FDTL),  sei fó seguransa másimu ba komemorasaun loron Proklamasaun Unilaterál Independénsia ba dala-50 (28 Novembru 1975-28 Novembru 2025).

Porta-voz Komandu Jerál Polísia Nasionál Timor-Leste (PNTL), Superintendente Polísia João Belo dos Reis, ba jornalista sira iha Komandu Jerál PNTL, Caicoli Díli, Segunda (24/11/2025) hateten, ekipa konjunta sei halo operasaun la’o ain tama-sai bairu  sira iha tempu kalan  hodi  garante  páz no estabilidade.

“PNTL hamutuk ho F-FDTL, ne’ebé ami bolu forsa tarefa kordenada, agora ami halo preparasaun maka’as ba seguransa loron 28  Novembru 2025. Husu ba maluk sira hotu atu kontribui no bele relata informasaun iha bairu idak-idak ba PNTL, ho nia parseiru sira bele responde tuir nesesidade ne’ebé ita iha,” Superintendente Polísia João Belo dos Reis informa.

Superintendente Polísia ne’e afirma, prezensa PNTL ho F-FDTL sei fo asisténsia seguransa másimu  ba  komunidade sira hodi evita konflitu.

Nia afirma, bazeia ba diretiva ne’ebé Komandu fo sai, parte seguransa sei mellora Patrullamentu no movimentu iha área hotu-hotu, depois halo  kontrolu tránzitu no prevene asidente sira iha estrada públiku.

“Ami sei mantein komunikasaun direta ho Komandu Operasaun Nasionál no Munisípiu sira, ami prontu responde rápida insidente sira ne’ebé emerjénsia no ami sei halo kordenasaun ba parte hotu-hotu atu ita bele halo intervensaun ne’ebé di’ak liu tan.” Tenik nia.

Nia apela ba komunidade sira, ekipa tarefa ne’ebé sei hamutuk ho autoridade Alfándega sei halo mós operasaun kontrola sasán ne’ebé kontra bandu hanesan fugetes no seluk tan.

Nia subliña, husu ba maluk sira katak, ekipa tarefa sira sei halo operasaun ba fugetes no iha tan ekipa seluk mai husi liña ministeriál sira interligadu halo operasaun tama sai bairu no estrada públiku sira, no mós iha Fronteira Terestre, Marítima, iha kosteira sira, atu kontrola mós importasaun hotu.

“Ba maluk sira ne’ebé importa sasán ilegál mai Timor-Leste ami sei la fo dalan ba kualkér atividade sira ne’ebé tama mai ho ilegál.” Nia informa.

Superintendente  Polísia João Belo dos Reis,  husu ba sidadaun hotu  bainhira haré ema ruma fa’an sasán ilegál  iha bairu laran, informa ba autoridade seguransa  hodi halo atuasaun nune’e prosesa tuir lei.

Reportajen ekipa Rafa.tl