Papa Leão XIV Hatene Di’ak Situasaun Timor-Leste no Akompaña Besik Situasaun Hotu Kona-bá Mundu

PR José Ramos Horta akompaña husi Vise-PM Mariano Asanami Sabino ho Sofia Hornai dos Santos hato'o mensajen Papa Leão XIV iha Palásiu Prezidensiál, Segunda (24/11/2025). Imajen/Rafa.tl

DILI, RAFA.tl- Prezidente Repúblika (PR), José Ramos-Horta hateten, Papa Leão XIV hatene di’ak kona-bá situasaun Timor-Leste nian no sempre akompaña besik situasaun hotu-hotu kona-bá mundu tomak.

Notísia Relevante: Sofia Hornai dos Santos, Negosiante Dahuluk Ne’ebé Hasoru Papa Leão XIV

Prezidente Repúblika José Ramos-Horta informa, nia ko’alia ho Papa Leão XIV iha de’it meia ora nia laran, no Papa Leão XIV mós informadu no hatene ona situasaun hotu kona-bá Timor-Leste, tanba ne’e, durante hasoru malu ko’alia lalais de’it no foku mós ba situasaun mundiál, liu-liu ko’alia kona-bá páz iha mundu.

“Ami ko’alia kona-bá situasaun iha Timor-Leste, Amu Papa hatene no hatene di’ak liu, tanba Santa Sé sira nia informasaun 100%, situasaun iha ne’ebé kona-bá mundu, liu-liu kuandu iha igreja ruma, nunsiatura ruma, sira informadu di’ak teb-tebes. Ne’e duni, ha’u hanoin katak minutu 10 ka 20 ko’alia kona-bá Timor-Leste natón tanba nia (Papa Leão XIV) hatene,” Prezidente Repúblika José Ramos-Horta ba jornalista sira iha Palásiu Prezidensiál, Dili, hafoin fila husi vizita ba Vatikanu, Segunda (24/11/2025).

Xefe Estadu hateten, nia ho Papa Leão XIV ko’alia mós kona-bá situasaun internasionál. Hanesan deklarasaun ne’ebé mai husi Vatikanu (Santa Sé), no mídia Vatican news, kona-bá Amu Papa nia ko’alia sira  kona-bá situasaun iha Gaza, Palestina, iha Yemen, Myanmar, Sudaun no rai sira ne’e.

Durante Vizita Estadu ba Santa Sé husi loron 19 – 22 fulan-Novembru tinan 2025, Prezidente Repúblika pozisiona mós Timor-Leste iha palku mundiál, hodi selebra nia viajen husi luta ba demokrasia ne’ebé estável no nia papél nu’udar lian globál ba páz, rekonsiliasaun, no dignidade umana.

Iha vizita ba Vatikanu ne’e mós, Prezidente José Ramos-Horta konvida pesoalmente Sra. Sofia Hornai dos Santos, faluk ida ne’ebé badinas no vendedora ambulante, atu hamutuk ho ninia delegasaun nu’udár konvidadu espesiál ba Audiénsia Papál.

Aktu ida-ne’e fó atensaun internasionál ba dignidade silensioza, sakrifísiu, no forsa ne’ebé metin husi família timoroan sira.

Tia Sofia nia prezensa hetan elojia pesoál hosi Sua Santidade Papa Leão XIV, hodi destaka Prezidente nia kompromisu hodi fó onra ba sidadaun sira loro-loron nian.

Iha Itália, Prezidente hala’o enkontru estratéjiku ida ho Profesór Andrea Riccardi, fundadór Komunidade Sant’Egídio nian, iha loron 20 fulan-Novembru, iha Roma. Sira diskute valór sira ne’ebé fahe no esplora dalan sira ba kolaborasaun iha mediasaun no defende ema sira ne’ebé vulnerável liu iha mundu.

Prezidente mós atribui Kolár Orden Timor-Leste nian ba Dr. Andréas Josef Kreis, distintu oftalmolojista Suisu, hodi rekoñese ninia dékada servisu esepsionál no dedikadu ba setór saúde Timor-Leste nian. Prémiu prestijiadu ne’e atribui ba Dr. Andréas Josef Kreis, tuir Dekretu Prezidente Repúblika No. 118 /2025, ne’ebé realiza iha Piazza della Repubblica iha Roma, Itália.

Molok konklui vizita iha Itália iha loron 22 fulan novembru, Prezidente no delegasaun presta sira-nia respeitu ba Sua Santidade Papa Francisco nia kampa iha Bazílika Santa Maria Maiór (Bazílika di Santa Maria Maggiore) iha Roma.

Reportajen ekipa Rafa.tl