Tribunál Aplika Medida Proibisaun Auzénsia Ba Xinés Ida Ne’ebé Utiliza Arma PNTL

Arguidu SD ho nasionalidade Xina bainhira partisipa iha primeira interogatóriu iha TJPID, Sesta (21/11/2025). Imajen/Rafa.tl

DILI, RAFA.tl – Tribunál Judisiál Primeira Instánsia Díli (TJPID), liuhosi despaixu ba prosesu primeiru Interrogatóriu,  Sesta (21/11/2025), deside aplika medida Termu Identidade Residéncia (TIR),  medida Aprezentasaun Periódika (AP) no proibisaun ba auzénsia ba iha arguidu ho inisiál SD ho medida kausaun US$10,000.00.

Notísia Relevante: Kazu Utiliza Arma, PNTL Aprezenta Sidadaun Xinés ho Inisiál SD Ba Tribunál

Iha medida Aprezentasaun Periódika (AP) tribunál husu atu arguidu SD nu’udár sidadaun estranjeiru ho nasionalidade Xina  ne’e aprezenta an ba iha Eskuadra PNTL Dom-Aleixo fulan ida dala rua, no  medida proibisaun ba auzénsia ne’ebé bandu arguidu sai husi teritóriu Timor-Leste durante prosesu ne’e la’o hela.

Iha julgamentu primeiru interogatóriu, Ministériu Públiku (MP), promove arguidu ba iha tribunál ho krime arma proibidu ne’ebé revista iha artigu 211 husi kódigu prosesu penál Timor-Leste.

“Krime ne’ebé nia komete, armas proibidos iha artigu 211 kódigu penál Timor-Leste. Normalmente pedidu husi Ministériu Públiku nian husu kona-bá aprezentasaun periódika no medida koasaun US$10,000.00. Tribunál nia despaixu fó TIR, proibisaun de auzénsia mais aprezenta Periódika fulan ida dala rua,” Advogadu Privadu, Jerónimo Piedade da Silva ba Jornalista sira iha Caicoli.

Advogadu Privadu ne’ebé fasilita asisténsia legal ba arguidu SD ne’e hatutan, nia parte la konkorda, sei haré ba oin, atu halo rekursu ka lae kona-bá despaixu ida ne’e, tanba iha indikasaun katak iha detensaun ne’ebé iha iregularidade uitoan,  maibé ikus mai Tribunál opta ba  medida  koasaun tolu.

Prosesu ne’e prezide husi Juíz turnu, José Gonçalves, Ministériu Públiku reprezenta husi Prokurador João Marques, arguidu hetan asisténsia legál husi  Advogadu Privadu Jerónimo Piedade da Silva.

Reportajen ekipa Rafa.tl