Ramos-Horta Simu Titular Doutoramentu Honoráriu husi Universidade Messina-Italia

Prezidente Repúblika, José Ramos-Horta simu títulu Doutoramentu Honoráriu iha área Siénsia Polítika husi Universidade Messina-Italia. Imajen/Média G-PR

DILI, RAFA.tl– Prezidente Repúblika (PR), José Ramos-Horta, simu títulu Doutoramentu Honoráriu (Doutór Honoris Causa) iha área Siénsia Polítika husi Universidade Messina-Italia ne’ebé prestijiadu.

Iha komunikadu ofisiál ne’ebé Rafa.tl asesu husi Gabinete Média Prezidénsia Repúblika, Kinta (20/11/2025), relata onra akadémika aas ne’e rekoñese kontribuisaun esesionál Prezidente Repúblika nian ba rezolusaun konflitu diplomasia no konstrusaun nasaun.

Iha diskursu agradesimentu, José Ramos-Horta, espresa gratidaun boot no aprezenta jornada Timor-Leste nian husi luta to’o soberania nu’udár sasin ba kbiit perdaun no rekonsiliasaun nian.

Xefe Estadu Timor-Leste hato’o mós susesu notavel Timor-Leste nian hafoin independénsia, hodi subliña estatutu nasaun nian nu’udár demokrásia vibrante ho ekonómia ida ne’ebé robusta no buras daudaun dívida públika mínimu no jestaun finanseira prudente.

Ramos-Horta pozisiona rekonsiliasaun istórika ho Indonézia ne’ebé transforma pasadu ida ne’ebé moruk ba relasaun bilaterál ida-ne’ebé besik liu iha mundu nu’udár modelu globál ida ne’ebé forte. Narrativa ida-ne’e hatudu ho klaru transformasaun Timor-Leste nian ba nasaun estável no dezenvolvimentu hela ne’ebé harii ho fundasaun korajen vizaun estratéjika no kompromisu metin ba pás.

Prezidente Repúblika, José Ramos-Horta, fó sai apelu maka’as ba reforma urjente Nasoins Unidas (ONU) nian partikularmente Konsellu Seguransa atu halo nia sai ekitativu no efetivu liu.

Premiadu Novel ba Paz  nian iha tinan 1996 ne’e ko’alia ho laran-susar boot kona-bá konfliktu globál sira hodi deskreve situasaun iha Gaza nu’udár “rai-kuak morál no polítiku” ida-ne’ebé dezafia ita-nia umanidade komún.

Timor-Leste nia pozisaun hanesan lian konsiénsia nian iha palku mundiál, hodi oferese ninia istória rasik nu’udar mensajen esperansa katak diálogu no kooperasaun bele manán divizaun sira-ne’ebé kle’an liu.

Reportajen Ekipa Rafa.tl