Reitór UNTL João Soares Martins Sei Halo Prosesa Dixiplinár Hasoru Pesoál sira Ne’ebé Keixa Nia Ba PNTL

Dirijente sira husi Diresaun Inspesaun Jerál no Auditoria UNTL Keixa Reitór João Soares Martins Ba PNTL, Sesta (14/11/2025). Imajen/Rafa.tl

DILI, RAFA.tl –Reitór Universidade Nasionál Timor-Lorosa’e (UNTL), João Soares Martins, sei halo prosesu dixiplinár hasoru pesoál sira ne’ebé keixa nia ba Polísia Nasionál Timor-Leste (PNTL), liu-liu iha Diresaun Servisu Investigasaun Kriminál Nasionál (DSIKN).

Notísia Relevante: MESSC Sei Nomeia Fiskál Úniku Troka Diresaun Inspesaun Auditória no Kontrolu Kualidade UNTL

Iha Sesta (14/11/2025), dirijente sira husi diresaun inspesaun jerál auditoria no kontrolu kualidade UNTL halo keixa hasoru reitór João Soares Martins ba PNTL liu husi DSIKN, tanba deskonfia halo abuzu podér hodi hasai despaixu taka diresaun inspesaun jerál auditoria no kontrolu kualidade UNTL.

“Kestaun sira ba kesar reitór ne’e aktu indixiplinár, no ita sei prosesa mós kestaun dixiplinár ba sira,” Reitór UNTL, João Soares Martins responde jornalista sira iha Gimnaziu Díli, Segunda (17/11/2025).

Reitór ne’e esplika estatutu foun UNTL nian ne’ebé Prezidente Repúblika promulga la prevé gabinete auditoria, tanba ne’e mak hapara ka líkida tiha gabinete auditoria, tanba estatutu foun la tau iha ne’ebá.

Estatutu foun, Vise Gabinete Auditoria sei kompete ba kompeténsia Fiskál Úniku, ne’ebé UNTL husu ona Ministériu Ensinu Superiór Siénsia no Kultura (MESSC), hodi nomeia fali entidade, ka ema ida atu sai Fiskál Únika iha Universidade Nasionál Timor-Leste  (UNTL).

“Atu taka departamentu ida ne’e normal, tanba governu taka Empreza Públika (E.P) no Institutu Públiku (I.P)  sira ne’e diak hela, ema la lori ba tribunál, governu ida sa’e, Ministériu ida taka tomak mós ema laiha problema ida. Se gabinete auditoria mak la eziste, ne’e estatutu mak husu labele eziste. Taka diresaun inspesaun auditoria ne’e di’ak hela, tanba fiskál úniku mak sei foti responsabilidade autoridade nian,” Nia esplika.

João Martins afirma katak, bainhira  diresaun inspesaun jerál auditoria no kontrolu kualidade UNTL nian ne’e taka, funsionáriu sira sei destaka ba hotu rekursu umanu, hafoin Universidade koloka ema tuir sira nia abilidade, nune’e labele tau ema arbiru de’it iha fatin.

Diresaun  inspesaun jerál auditoria no kontrolu kualidade Universidade Nasionál Timor-Leste  estabelese iha tinan 2010 to’o ohin loron.

Reportajen ekipa Rafa.tl