Deskonfia, Superintendente Asistente Polísia AQ Falsifika Dokumentu Veteranu hodi Hetan Grau 8 a 14

Portavós Interinu Komandu Jerál PNTL, Superintendente Asistente Polísia Mouzinho T. Correia, fó sai ba públiku relativa ho kazu deskonfia falsifika dokumentu veteranu husi membru PNTL ho inisiál AQ. Imajen/Rafa.tl

DILI, RAFA.tl – Komandu Jerál Polísia Nasionál Timor-Leste (PNTL) fó ona notifikasaun ba testemuña na’in-rua relasiona ho informasaun kona-bá membru PNTL na’in-ida ho insiál AQ ne’ebé deskonfia falsifika dokumentu veteranu  hodi hetan grau 8 a 14.

Portavós Interinu Komandu Jerál PNTL, Superintendente Asistente Polísia Mouzinho T. Correia, ba jornalista sira iha edifísiu Ministériu Interiór, Vila-Verde, Dili, Kinta (06/11/2025) hateten, parte Komandu Jerál PNTL hetan ona despaixu hodi notifika testemuña na’in-rua hodi kotinua investigasaun ba kazu falsifikasaun dokumentu veteranu nian ne’ebé  deskonfia envolve husi Superintendente Asistente Polísia ho inisiál AQ.

“Tuir planu instituisaun ne’ebé  iha, naturalmente ita sei buka testemuña sira, inklui mós ba iha Komisaun Verifikasaun Veteranu sira iha Munisípiu Lautém. Maka ita haré, ita seidauk bele halo konkluzaun ruma ba kazu ida tanba foin simu despaixu,”  Superintendente Asistente Polísia Mouzinho T. Correia informa.

Nia hatutan, Komandu Jerál PNTL sei haruka ekipa husi diresaun servisu informasaun kriminál sei bá iha Konsellu nian.

“Ita notifika ona ema na’in-rua hanesan testemuña liu husi parte ne’ebé hato’o keixa ne’e, horseik, ita notifika ona  no prosesu sei la’o. Iha tempu badak ekipa ida sei bá Munisípiu Lautém rekolla tan informasaun husi parte relevante sira,” Portavós interinu PNTL ne’e hateten.

Superintendente Asistente Polísia ne’e subliña, parte Komandu Jerál PNTL sei nafatin halo investigasaun kle’an ba kazu ne’e molok aprezenta ba Ministériu Públiku.

Reportajen ekipa Rafa.tl