Kandidatu Polísia Tuir Teste Fíziku Rona Instrusaun no Kumpre Regra

Kandidatu PNTL tuir teste fíziku iha Akademia Polísia, Comoro, Dili, Kinta (06/11/2025). Imajen/Rafa.tl

DILI, RAFA.tl– Segundu Komandante Jerál Polísia Nasionál Timor-Leste (PNTL) nu’udár mó Prezidente juri ba konkursu kandidatu foun PNTL 2025, Komisáriu Pedro Belo  husu kandidatu sira ne’ebé  tuir teste fíziku iha Sentru Formasaun Polísia Akademia, Comoro, atu rona instrusaun sira ho di’ak no kumpre regra sira husi ekipa juri, nune’e bele hetan rezultadu di’ak.

Notísia Relevante: Kandidatu Ajente PNTL Na’in-12.851 Pasa iha Selesaun Dokumentu

“Husu ba alin sira hodi halo tuir regra hotu-hotu ne’ebé implementa ona tuir ita nia lei Diploma Ministeriál Númeru 37/2025, ita-boot sira halo tuir didi’ak orsida iha instrusaun ruma husi ekipa téknika ne’ebé mak hamutuk ho ita-boot sira, halo tuir didi’ak, ha’u fiar ita-boot sira hotu-hotu prepara an fíziku durante fulan hirak nia laran,” Komisáriu Pedro Belo hateten bainhira hlao abertura ba teste fiziku ba kandidatu membru PNTL sira iha Sentru Formasaun Polísia Akademia, Comoro, Kinta (6/11/2025).

Komisáriu Polísia ne’e hatutan ba kandidatu sira ne’ebé prepara an sei hetan rezultadu di’ak iha teste fíziku, oral no psikotest.

Prezidente juri  rekrutamentu PNTL 2025 ne’e mós bandu atu ekipa téknika sira fó instrusaun ba kandidatu sira la tuir regra, hodi garante transparénsia no profisionalidade iha prosesu hotu ba rekrutamentu.

“Ita-boot sira ne’ebé prepara an, orsida bele hetan valór di’ak, ohin, ita hahú husi Munisipíu Aileu, ne’ebé halo tuir instrusaun sira ne’ebé iha, husu ba ekipa téknika sira, ita-boot sira akompaña sira ho didi’ak, tuir regra sira ne’ebé mak iha, labele halo liu regra ne’ebé iha,” Komisáriu Pedro Belo afirma.

Kandidatu sira husi Munisípiu Aileu maka hahú uluk tuir  teste fíziku, prova orál  no psikotest, iha Polísia Akademia Comoro, hamutuk na’in-300.

Husi kandidatu sira tuir teste fíziku ne’e o fahe ba parte dadér, kandidatu 150, hahú hosi oras 7:30 -12:30 Otl, no parte loraik kandidatu sira na’in-150 kontinua hosi oras 13:30 – 17:30 Otl. Totál kandidatu ne’ebe sei tuir teste fíziku, orál no psikotest hamutuk husi teritóriu nasionál hamutuk na’in-19.996.

Reportajen ekipa Rafa.tl