Komandu PNTL Konfirma Ajente Polísia Benjamin dos Santos Tiru An Tanba Presaun

Komisáriu Jerál PNTL Henrique da Costa. Imajen/Média PNTL

DILI, RAFA.tl—Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa, konfirma katak membru Unidade Patrullamentu Fronteira (UPF) Ajente Polísia Benjamin dos Santos, tiru an tanba deskonfia iha presaun.

Membru Ajente Polísia Benjamin dos Santos tiru an iha hariis fatin laran igha  Postu UPF Ponte Nunura, Suku Leolima, Munisípiu Bobonaro, iha loron 29 fulan-Outubru ne’e, hale’u tuku 15:00 Otl.

“Ha’u rona relatóriu husi Komadante UPF katak membru ida iha Bobonaro nian tiru an. Ha’u orienta kedas  parte Forensik nian ba kedas iha fatin akontesimentu no investigasaun halo hela, nia servisu buat balun ne’ebé dalaruma ligadu kona-ba kolokasaun servisu, ita-nia ema ba iha ne’ebá limitadu, katak ema na’in-rua no na’in-tolu deit, ida-ne’e mos bele impaktu ba ema nia presaun ne’ebé maka’as nia bele foti desizaun hanesan ne’e,” Komisariu Jerál Polisia Henrique da Costa, informa  ba jornalista sira iha Kuartel Unidade Espesiál Polísia (UEP) iha Bairru-Pité, Dili, Kinta (30/10/2025).

Komisáriu Jerál Polísia Henrique da Costa hatutan, tanba nia iha servisu presaun mak ema ida de’it nia servisu iha oras 24 nia laran, nia kontrola distánsia ne’ebé mak dook, ida-ne’e mós bele sai poténsia tanba  antes ne’e membru ne’e normal hela.

“Ita nia parte investigasaun halo hela  servisu depois sei relata mai komandu,” Henrique da Costa hateten.

Reportajen Ekipa Rafa.tl