Konsellu Superiór Polísia Sei Foti Desizaun Ba Membru CSP Fó Pistola ho Kilat Ba Ema Estranjeiru Tiru iha Kaitehu

Sidadaun estranjeiru ho nasionalidade Xina utiliza kilat hodi treinu tiru iha fatin instalasaun treinu tiru nian iha área Kaitehu, Liquiça, foin lalais ne'e. Imajen/Repro.Espesiál

DILI, RAFA.tl-Investigasaun ba membru Polísia Nasionál Timor-Leste (PNTL) husi unidade Korpu Seguransa Pesoál (CSP, sigla portugés) ne’ebé fó pistola ho kilat ba siadadaun ka ema estranjeiru ho nasionaliza Xina la’o hela. Mézmu nune’e, Komandu Jerál PNTL mós hola ona suspensaun preventive atu fasilita Diresaun Disiplina no Justisa Polísia kompleta prosesu. Tomak hodi lori ba diskute iha Konsellu Superiór Polísia nian.

Notísia Relevante: Ministru Interiór “Ameasa” Hasai Membru CSP Fasilita Kilat ho Pistola Ba Sidadaun Estranjeiru Treinu Tiru

“Iha fulan oin, Konsellu Superiór Polísia sei deside kona-bá futuru membru CSP ne’e bazeia ba faktu sira ne’ebé Diresaun Disiplina Justisa Polísia  aprezenta,”  Komandante Jerál PNTL Komisáriu Jerál Polísia  Henrique da Costa, informa hodi hatán jornalista sira  iha Kuartel Unidade Espesiál Polísia (UEP) Bairru-Pité, Dili, Kinta (30/10/2025).

Aktu membru CSP ne’ebé fó arma ba ema estranjeiru ho nasionalidade Xina hodi tiru halimar iha fatin treinamentu tiru nian iha  Kaitehu, Munisípiu Liquiça iha loron 15 fulan-Setembru 2025, tuir Komisáriu Jerál Polísia Henrique da Costa, katak rezultadu investigasaun mak sei komprova membru ne’e nia hahalok kategoria gravé ka lae.

“Hakarak hateten katak arma Estadu nian,   entrega ba  ha’u hanesan Polísia, ha’u mak bele uza. Sé entrega ba iha membru PNTL ida, nia rasik mak bele uza,” Henrique da Costa afirma.

Komisáriu Henrique hateten, membru PNTL ne’ebé fó arma ba fali ema sivíl estranjeiru hodi tiru halimar ne’e falta responsabilidade.

Komandante Jerál PNTL ne’e informa,  regra ba kontrolu arma no jere arma ne’e klaru tuir lei orgánika PNTL ne’e, katak  membru PNTL de’it mak uza arma ne’e.

Kilat ne’ebé membru CSP fasilita ba sidadaun Xinés  treinu tiru ne’e ho marka M-Five (M5) no Pistola ho marka Glock-19.

Reportajen Ekipa Rafa.tl