Dezembru, Governu Halo Atribuisaun Úniku Ba Mártir sira Ne’ebé Mate Klosan Durante Luta Ba Libertasaun Nasionál

Ministru Asuntu Kombatente no Libertasaun Nasionál, Gil da Costa Monteiro “Oan Soru”. Imajen/Rafa.tl

DILI, RAFA.tl– Hahú fulan-Dezembru, tinan ne’e, Governu liuhosi Ministériu ba Asuntu Kombatente no Libertasaun Nasionál (MACLN, sigla portugés) sei halo atribuisaun úniku ho montante $10,000.00 ba mártir sira ne’ebé mate klosan iha ai-laran durante funu ba luta libertasaun nasionál.

Atribuisaun ida ne’e bazeia ba dekretu lei númeru, 35/ 2025, 15 de Outubru, kona-ba apoiu finanseiru úniku nu’udar konsiderasaun ba família mártir sira iha luta libertasaun nasionál.

Ministru Asuntu Kombatente no Libertasaun Nasionál, Gil da Costa Monteiro “ Oan Soru” ba jornalista sira, Segunda (27/10/2025) hateten, ho vontade tomak hakarak hato’o omenajen ba mártir sira hotu ne’ebé luta ba libertasaun nasionál ho termu lei númeru 3/2006 dia 12 de Abril, altera ba lei númeru 9/2009, dia 29 de Juñu, 2/2011 dia 23 de Marsu, 3/2024 de 12 de Juñu.

Iha Artigu 27 iha alinea a)  estatutu ba kombatente  libertasaun nasionál aprova iha lei númeru 3/2006 iha dia 12 de Abril, altera ba lei númeru 9/2009, dia 29 de Jullu, 2/2011 dia 23 de Marsu/ 3/2024 de Juñu, hodi esklui ba família mártir sira iha direitu atu simu pensaun ba sira nia família ne’ebé mate iha funu laran mate ho klosan, faluk, ba sira ne’ebé la iha ona lei fo dalan ba sira substitui sira nia fatin hodi simu atribuisaun úniku husi governu.

“Ita husu ba família mártir sira atu kompleta dokumentu tuir rekizitu ministériu nian hahú husi loron 28 fulan-Outubru to’o iha fin  Novembru tinan 2025,” Gil da Costa Monteiro “Oan Soru” esplika.

Governante ne’e afirma, família mártir sira tenke prenxe lolós rekezitu ne’ebé mak tuir Ministériu iha, no família mártir sira ne’ebé iha direitu atu simu atribuisaun ne’ebé atribui husi governu ne’e. Durante iha luta libertasaun nasionál mós la iha kolaborasaun ho inimigu, karik iha família ruma ne’ebé durante ne’e kolabora ho  inimigu, la iha direitu atu simu atribuisaun husi governu. Família sira iha direitu atu rekere ema na’in ida de’it, karik iha família sira liu na’in tolu ka haat, úniku na’in ida mak hetan rekerimentu.

Governante ne’e mós husu ba públiku atu labele falsifika dokumentu husi mártir sira nian, liu-liu naran no dokumentus seluk tan.

“Ba ema hotu-hotu labele inventa dokumentu hodi tau ema seluk hanesan ninia maun ka ninia alin ou tau ema seluk, hanesan ne’e kuidadu halo didi’ak, tanba buat ne’ebé mak nia deklara iha formuláriu ohin ne’e, se nia mak inventa buat ruma, aban bairua investiga hetan, nia sei devolve fila-fali pakote ida nia simu ne’e,” Nia subliña.

Tuir dadus ne’ebé mak dadaun ne’e iha, ministériu lolós prevé ba benefisiáriu 3000, maibé dadaun ne’e foin rejista 1.230 no benefisiáriu sira ne’ebé mak naran fó sai iha tinan 2009.

Enkuantu dokumentu sira ne’ebé presiza atu kompleta mak hanesan, foto kópia eleitorál husi rekerente, foto kópia billete identidade, sertidaun RDTL ka sertidaun Batizmu, deklarasaun nasimentu, konta banku husi rekerente, no dokumentus sira ne’e sei submete iha konsellu libertasaun nasionál iha munisípu hafoin mak submete ba iha nasionál.

Reportajen ekipa Rafa.tl