Mari Alkatiri Konsidera Timor-Leste Nia Adezaun Ofisiál Ba ASEAN Susesu Koletivu

Sekretáriu Jerál partidu FRETILIN, Mari Alkatiri, to'o fali iha Timor-Leste hafoin halo viajen ba Portugál no Reinu Unidu. Imajen/Rafa.tl

DILI, RAFA.tl– Sekretáriu Jerál Partidu Frenti Revolusionáriu Timor-Leste Independente (FRETILIN), Mari Bin Amude Alkatiri hateten, Timor-Leste nia adezaun ba ASEAN nu’udár susesu koletivu povu Timor-Leste nian.

Notísia Relevante: Liu Tiha Dékada Ida, Timor-Leste Ofisialmente Sai Membru ASEAN Ba Dala-11

Sekretáriu Jerál Partidu FRETILIN, Mari Alkatiri ba jornalista sira iha Aeroportu Internasionál Prezidente Nicolau Lobato, Segunda (27/10/2025) hateten Timor-Leste nia susesu adezaun ba ASEAN, ida ne’e ema hotu nia esforsu, tanba ne’e Timor-Leste manán ona tenke hamutuk fila-fali atu harí nasaun ida ne’ebé prósperu liután iha futuru.

“Ita tama ona ba ASEAN, horseik, ha’u para tiha iha Kuala Lumpur mas la sai husi Aeroportu, ha’u rona katak festa boot, ha’u hakarak de’it katak husi ne’e ba oin, festa ne’e sai festa ita nian hotu, labele balun nian de’it, tanba mehi ne’e hahú ho FRETILIN duni. Ita tama ASEAN tenke tama ho pensamentu ida ne’e, ASEAN ne’e ema hotu nian,” Mari Alkatiri hateten.

Timor-Leste agora hamutuk iha organizasaun rejionál ne’ebé bolu Sudeste Aziátiku (ASEAN) iha rai 11, no Timor-Leste halibur hamutuk iha grupu boot rua importante tebes, ida ne’ebé bele bolu indo-Xina no ida seluk fali mak Insul-India signifika liga hotu ba Indu no signifika husi india tun mai hotu iha Pasífiku, ne’e mak istóriku tanba ne’e hamutuk para hatene buat sira ne’e mai husi ne’ebé.

Ne’e mak realidade geopolítika ba iha ASEAN hanesan bloku ida atu afirma nia an iha mundu rai klaran. Idak-idak ho nia Kultura, ho relijiaun,  lian (Língua).

Fundadór RDTL ne’e mós afirma susesu ne’ebé maka Timor-Leste iha ne’e la presiza halo festa ne’ebé boot atu selebra iha fatin hotu-hotu, maibé importante liu maka Timor-Leste tenke prepara kapasidade ba nia rekursu sira, saida maka presija halo tan iha futuru atu garante ba dezenvolvimentu nasaun nian.

“Sei iha opiniaun oin-oin katak Timor-Leste seidauk preparadu, Timor-Leste lahatene atu halo saida iha ASEAN, ha’u dehan fila-fali, uluk ita manán tanba kauza ida ita hotu hamutuk, agora se ita hakarak manán ita hotu tenke hamutuk, ita nia hakarak sai membru tama ASEAN ne’e katak susesu ho ita hotu,” Alkatiri subliña

Líder opozisaun ne’e haktuir uluk iha tempu susar povu no líder sira hamutuk iha kualker situasaun tanba ne’e agora susesu boot ne’ebé Timor-Leste iha ba oin tenke buka malu atu ko’alia di’ak liu tan nasaun ne’e nia destinu ba futuru.

 Reportajen ekip Rafa.tl