Prezidente Repúblika José Ramos-Horta Partisipa Serimónia Adezaun Ofisiál Timor-Leste Nu’udár Estadu Membru ASEAN

PR José Ramos-Horta sai oradór kona-bá asuntu ASEAN. Imajen/Dok.G-PR

DILI, RAFA.tl – Prezidente Repúblika (PR), José Ramos-Horta, hala’o vizita ofisiál ba Kuala Lumpur-Malázia hodi partisipa iha serimónia formal no ofisiál adezaun Timor-Leste nian nu’udár Estadu Membru ba Asosiasaun Nasaun Sudeste Aziátiku (ASEAN) nian ba dala-11.

Notísia Relevante: PM Xanana Ba Malázia Asiste Formalizasaun Adezaun TL Ba ASEAN no Partisipa Simeira ASEAN Ba Dala-47

Iha komunikadu ofisiál ne’ebé Rafa.tl asesu husi Gabinete Mídia Prezidente Repúblika, Sesta (24/10/2025) hateten Simeira ASEAN ba dala-47 no Simeira sira relevante sei hala’o iha Kuala Lumpur, Malázia, husi loron 26 to’o 28 fulan outubru 2025.

Simeira ne’ebé ho tema “Inkluzividade no Sustentabilidade”, sei halibur Xefe Estadu no Governu na’in-30 resin, inklui Prezidente Estadus Uunidus Amérika, Donald Trump, Primeiru-Ministru Xina, Li Qiang, Prezidente Brazíl, Luiz Inácio Lula da Silva, Prezidente Áfrika Súl, Cyril Ramaphosa, no Primeiru-Ministru Índia, Narendra Modi.

Iha loron 26 fulan-Outubru, Prezidente Ramos-Horta sei sai sásin ba momentu istóriku importante ida ne’e ba nasaun iha Sentru Konvensaun Kuala Lumpur. Asinatura deklarasaun kona-ba Admissaun Timor-Leste nian ba ASEAN reprezenta kulminasaun husi preparasaun institusionál, diplomátika no téknika durante dékada rua nia laran ba integrasaun totál iha komunidade rejionál.

Timor-Leste nia prezensa iha Simeira ASEAN ida ne’e, nu’udar testamentu ba kompromisu metin ba destinu nu’udar membru totál família Sudeste Aziátiku nian.

“Ita la’ós de’it hametin ita nia pozisaun iha rejiaun, maibé mós harí ponte ho parseiru globál xave sira. Timor-Leste hateke ba oin no prontu atu kontribui ba páz, estabilidade no prosperidade komún iha rejiaun,” hateten Prezidente José Ramos-Horta iha komunikadu ne’ebé Rafa.tl sita.

Iha loron 27 fulan-Outubru, Prezidente Ramos-Horta sei hala’o enkontru bilaterál estratéjiku oi-oin, inklui diskusaun ho Sekretáriu Estadu EUA, Mark Rubio, no ninia delegasaun. Iha kalan, Prezidente sei partisipa iha jantar ida ne’ebé oferese husi Primeiru-Ministru Malázia nian, Dato’ Seri Anwar Ibrahim.

Prezidente Ramos-Horta sei hasoru malu mós ho Prezidente Konsellu Europeu, António Costa.

Prezidente Ramos-Horta sei remata ninia vizita ofisiál ba Malázia iha ninia kapasidade nu’udar Profesór Adhuntu Onoráriu, hodi hato’o palestra prinsipál ida ba estudante sira no ba eskola Direitu no Governasaun iha Universidade Taylor’s.

Vizita ida ne’e subliña dedikasaun metin Xefe Estadu nian atu promove interese estratéjiku Timor-Leste nian iha nível mundiál no hametin lasu sira ne’ebé forte liután ho parseiru rejionál no internasionál sira.

 Reportajen ekipa Rafa.tl