Fronteira Tasi TL-RI Sai Preokupasaun Munisípiu Lautem Ba Implementa Planu Ekonomia Azúl

Prezidente Autoridade Munisípiu Lautem, Melio de Jesus. Imajen/Média G-PM

DILI, RAFA.tl– Prezidente Autoridade Munisípiu Lautem, Melio de Jesus hateten fronteria tasi entre Timor-Leste ho Repúblika Indonézia, liu-liu iha illa Wetar sai preokupasaun autoridade Munisípiu Lautem hodi kontrola bio-diversidade no riku-soin sira tasi nian tanba fronteira marítima nasaun rua seidauk iha definitivu.

Notísia Relevante: Infrastrutura Báziku Sai Dezafiu Ba Munisípiu Viqueque Atu Implementa Planu Asaun Ekonomia Azul

Prezidente Autoridade Munisípiu Lautem, Melio de Jesus ba Rafa.tl iha Ministériu Finansas, Dili, Tersa (21/10/2025), hateten área Lautem kobre tasi mane no feto, tanba ne’e ho polítika no planu asaun ekonomia azúl 2025-2035 ne’ebé IX Governu Konstitusionál lideradu husi Primeiru-Ministru Kay Rala Xanana Gusmão hakarak implementa, Munisípiu Lautem sei hasoru difikuldade tanba fronteira marítima ho Indonézia sei iha disputa ka seidauk definitivu.

Nia afirma Munisípiu Lautem kobre tasi feto no mós tasi mane ne’ebé ho fronteira entre provinsia Maluku Utara, liu-liu Maluku Tenggara Indonézia nian, ida ne’e dezafiu boot ba rai doben Timor-Leste liu-liu Munisípiu Lautem.

Nia hatutan, tasi nia luan  susar  atu kontrola, tanba tasi ho medida ne’ebé maka luan fronteira ho Austrália nune’e mós iha parte Norte baliza ho Indonézia, ida ne’e hotu fó impaktu boot, liu-liu ameasa ba peska ilegal no negosiu ilegal sira akontese iha tasi laran.

“Ami Munisípiu Lautem husu ba governu sentral liuhosi autoridade kompetente sira hanesan Polísia Maritima, ita nia Komponente Naval husi F-FDTL atu bele halo kontrolu ba ita nia tasi sira ne’ebé iha,” Melio de Jesus hateten.

Tuir nia, Governu ne’ebé lidera husi PM Xanana Gusmão, hahú ona negosiasaun ho Indonézia kona-bá linã fronteira maritima no iha fulan-Dezembru iha Jakarta-Indonézia, nune’e lori povu Lautem fó apresiasaun ba Governu ho inisiativa sira ne’e no espera negosiasaun ne’e bele hetan solusaun ida ne’ebé define fronteira marítima ho Indonézia.

Atu prezerva no konserva bio-diversidade iha tasi, Munisípiu Lautem mós kria ona atividade sira hanesan sosializasaun no kampaña nasionál ekonomia azúl ne’ebé maka komesa tiha ona iha fulan-Juñu liubá inklui halo workshop kona-bá poluisaun plastiku ne’ebé envolve estudante sira, inklui komunidade.

Munisípiu Lautem mós kontinua hala’o limpeza iha kada semana iha loron Sesta,  iha área tasi ibun sira iha postu-administrativu Iliomar, iha Iradarat, iha Maluro, Postu-administrativu Lautem iha Com, iha tasi ibun sira seluk iha postu-administrativu Tutuala, ne’ebé inklui praia Loikere to’o ba iha illa Jaco to’o iha fronteira Lorehe nian.

Autoridade Munisípiu Lautem mós hasai ona karta sirkular ida ba Autoridade Postu-Administrativu atu orienta komunidade sira ne’ebé hela iha tasi ibun, atu halo limpeza kada Sesta no implementasaun ne’e hahú tiha ona desde lansamentu ekonomia azúl iha fulan-Juñu liubá

Iha biban ne’e mós, Prezidente autoridade munisipíu hamutuk ho lider komunitaria sira, hato’o agradese ba Governu sentral liu-liu IX Governu Konstitusional relasiona ho polítika ekonomia azúl tanba ida ne’e bele kontribui ba diversifikasaun ekonómika no kontribui reseita ba Estadu Timor-Leste.

Reportajen ekipa Rafa.tl