Polísia Sei Halo Operasaun Ba Transporte sira Ne’ebé La Iha Sapa Matrikula no Espellu

Polísia halo monitorizasaun ba movimentu transporte iha kapitál Dili husi CCTV. Imajen/Rafa.tl

DILI, RAFA.tl– Diretór Polísia Tránzitu Seguransa Rodoviária Nasionál, Superintendente Xefe Antoninho Mauluta, informa Polísia  Tránzitu Seguransa Rodoviária sei halo operasaun iha Kapital Dili, hodi kontrola no halo apreensaun ba transporte públiku no privadu sira hanesan motór no karreta ne’ebé la utiliza sapa matrikula no espellu, inklui kontra sinál tránzitu sira.

Notísia Relevante: Durante Fulan-Sia, Timoroan 72 Lakon Vida Tanba Asidente Tráfegu

Superintendente Xefe Antoninho Mauluta ba Jornalista sira iha Komandu Jerál PNTL, Segunda (20/10/2025), hateten Polísia  Tránzitu Seguransa Rodoviária hahú ona fahe tarefa  servisu entre Polísia Tránzitu Seguransa Rodoviária Nasionál husi Komandu Jerál PNTL no Seksaun Polísia Tranzitu Komandu PNTL Munisípiu Díli hodi halo operasaun ka pasa revista ba transporte sira.

“Ha’u ko’alia tiha ona ho Komandante Tránzitu Munisípiu Dili, tanba ita fahe servisu, ami tranzitu husi Komandu Jerál PNTL sei halo patrolia iha dalan hetan transporte sira ne’ebe laiha sapa matrikula, laiha  espellu, no para sala sei prende hodi aplika koima ba sira,” Superintendente Xefe Antoninho Mauluta hateten.

Tuir nia, fahe tarefa ho tánzitu Munisípiu Dili  hodi asegura atu labele mosu situasaun sira ne’ebé afeta ba komunidade sira, tanba dalaruma sidadaun sira ne’ebé la utiliza Sapa Matrikula mosu asidente ruma sira halai husi responsabilidade.

Nia hatutan, tarefa ne’ebé Komandu Jerál ho PNTL Munisípiu Díli iha ne’e bazeia ba sirkular ne’ebé iha hodi garante seguransa ba komunidade sira hotu.

“ita sei kontrola kareta no motorizada ne’ebe la kumpri serkular ne’ebe fó sai ona husi Diresaun Nasionál Transporte Terrestre atu lalika para liu minutu lima husi Diresaun  Rotunda Prezidente  Nicolau Lobato-Comoro to’o Ponte B.J. Habibie,” Nia hatutan.

Komandu Jerál PNTL liu husi Diresaun Tránzitu Seguransa Rodoviária Nasionál nafatin husu ba sidadaun sira ne’ebé uza veíkulu sira, atu mantein kumpre orden no lei ne’ebé iha no labele hamosu infrasaun sira ne’ebé perturba ordem públiku.

Reportajen ekipa Rafa.tl