CFP Simu Ona Relatóriu husi MESSC Kona-ba Kazu Asédiu Seksuál Ne’ebé Deskonfia Komete husi Dosente MFB

Komisáriu Komisaun Funsaun Públika ba asuntu Dixiplinár, Agapito da Conceição. Imajen/Rafa.tl

DILI, RAFA.tl– Komisaun Funsaun Públika (CFP, sigla portugés) simu ona relatóriu husi Ministériu Ensinu Superior Siénsia no Kultura (MESSC, sigla portugés) kona-ba kazu asédiu seksuál ne’ebé deskonfia komete husi dosente ho inisial MFB hasoru estudante ativu no la ativu balun husi Departamentu polítika públika, fakuldade siénsia sosiál, iha Universidade Nasionál Timor Lorosa’e ka UNTL.

Notísia Relevante: Ministru José Honório Konfirma CFP Hahú Investiga Kazu Asédiu Seksual Ne’ebé Deskonfia Komete husi Dosente MFB iha UNTL

Komisáriu CFP ba asuntu Dixiplinár, Agapito da Conceição ba Rafa.tl iha Edifisiu CFP, Dili, Sesta ( 17/10/2025), hateten Funsaun Públika simu ona relatóriu husi MESSC iha Kinta,  (16 fulan-Outubru ne’e, kona-ba kazu asédiu seksuál ne’ebé akontese iha UNTL.

Nia afirma, normalmente kona-bá kazu asédiu seksuál, sei la’o tuir prosedimentu legál ne’ebé iha, sei liuhosi investigasaun, maka nia rezultadu foin fó sai.

“Ita sei haruka komisaun ne’ebé responsável ba kazu ne’e sei tun ba terenu hodi halo investigasaun hafoin foti desizaun. CFP sei investiga vítima, hafoin ba alegadu no ikus maka magnífiku reitor, atu nune’e, bele halo balansu ba informasaun,” Komisáriu Agapito da Conceição hateten.

Nia hatutan, aktu ne’ebé maka alegadu MFB prátika ne’e kontra estatutu Funsaun Públika no kódigu penal artigu 171, maibé Funsaun Públika labele foti uluk desizaun tanba seidauk halo investigasaun ba fonte ruma, tanba ne’e remata prosesu investigasaun maka sira bele deklara resultadu sansaun tuir grau ne’ebé maka alegadu ne’e komete

“Asédiu seksuál ne’e dalabarak liu ami fó sansaun ba alegadu sira, no grave sei halo demisaun, no bainhira nia grau ne’e kamán CFP fo de’it karta depresaun eskrita, ida ne’e sansaun sira ne’ebé maka CFP fo tuir nia grau ne’ebé maka komete husi alegadu sira,” nia tenik.

Nia argumenta, Komisaun Funsaun Públika seidauk simu relatóriu ruma husi parte UNTL ho razaun UNTL mos iha seksaun dixiplinár hodi halo investigasaun ba kazu refere ho nune’e sira seidauk submete relatóriu ba CFP.

Nia subliña, kazu asédiu seksuál ne’e la’os akontese de’it iha UNTL, maibé akontese mos iha instituisaun públiku sira balun, no funsionáriu públiku sira sempre komete, tanba ne’e funsaun públika rasik estabelese ona diresaun asédiu seksuál, atu nune’e kualker sidadaun ne’ebé hetan evidénsia bele levanta ba iha diresaun refere hodi CFP nia investigador sira tun ba terenu hodi halo investigasaun.

CFP halo ona dezaminasaun kona-ba asédiu seksuál to’o ona iha nível Munisípiu no postu Administrativu sira, oinsá maka bele halo prevensaun ba aktu sira hanesan ne’e iha instituisaun públiku sira.

Reportajen ekipa Rafa.tl