Komandu Jerál PNTL Aplika Sansaun Dixiplinár Ba Ajente-Xefe Polísia JLO Ne’ebé Tiru Nia Káben

Portavós Interinu PNTL, Superintendente Asistente Mouzinho T. Correia (klaran) halo konférensia imprensa iha Ministériu Interiór, Dili, Kinta (16/10/2025). Imajen/Rafa.tl

DILI, RAFA.tl- Komandu Jerál Polísia Nasionál Timor-Leste (PNTL) aplika sansaun dixiplinár ba Ajente-Xefe Polísia ho inisial JLO ne’ebé tiru nia káben iha Domingu (12/10/2025), iha área Aimutin, Aldeia São José, Suku Comoro, Postu-Administrativu Dom Aleixo, Munisípiu Dili.

Notísia Relevante: Tribunál Aplika Medida Aprezentasaun Periódika Ba Ajente-Xefe Polísia JLO Ne’ebé Tiru Nia Kaben

“Komandu Jerál PNTL mós fó ona sansaun dixiplinár ba membru PNTL ho inisiál JLO ne’ebé tiru nia káben, enkuantu prosesukKriminál mós la’o ona, ho NUC 0324/25.PNSIC. Polísia halo detensaun flagarante delitu no aprezenta ba Primeiru Interrogatório no Tribunal Judisial Primeira Instánsia Dili aplika medida koasaun aprezentasaun periódika dala-rua kada semana,” Portavós Interinu, Superintendente Asistente Mouzinho T. Correia ba jornalista sira iha Ministériu Interior, Kinta (16/10/2025).

Antes ne’e, Tribunál Judisiál Primeira Instánsia Díli (TJPID), liuhosi Juiza Jumiati Freitas hasai despaixu hodi aplika medida koasaun Aprezentasaun Periódika ba membru PNTL ho inisial JLO ne’ebé tiru nia káben ho kondisaun isin-rua hela.

Prosesu interogatóriu dahuluk ba kazu ne’e iha sala julgamentu Prokuradór ne’ebé reprezenta husi Aderito Tilman promove arguidu ho krime ofensa integridade fízika grave ne’ebé previstu no punidu iha artigu 146 husi Kódigu Penál Timor-Leste.

Durante interrogatóriu dahuluk ba arguidu, iha alegasaun, Ministériu Públiku (MP) nian, solisita ba Tribunál atu aplika justisa ne’ebé justu ba arguidu.

Iha alegasaun Defeza arguidu JLO, Defensor Públiku Estaquio Guterres husu aprezentasaun periódika ho razaun tanba arguidu nia hahalok ne’e la’os ho intensaun maibé ho deskuidu. Hafoin rona tiha parte hotu, Juiza Julmiati Freitas hasai despaixu hodi aplika média koasaun Aprezentasaun Periódika semana ida dala ida iha Komandu PNTL.

Iha interrogatóriu dahuluk  ne’e Defeza  Estaquio Guterres hateten despaixu Tribunal Judisiál Primeira Instánsia Díli (TJPID), ba membru Polísia ne’e, sei iha hela prosesu, tanba ne’e presiza halo  investigasaun fali hodi rona vítima nu’udar nia káben.

Iha Domingu (12/10/2025) iha Hospital HNGV,  vítima VCV hateten, nia kondisaun agora dadaun ne’e isin-rua (grávida), no nia ain parte loos la di’ak no mós sei fó mós impaktu ba nia saúde ho bebé ne’ebé  iha nia knotak, tanba ida ne’e nia hakarak lori kazu ne’e ba oin.

“Kazu ne’e ha’u sei levanta ba oin atu bele hetan justisa” hateten VCV.

Reportajen ekipa Rafa.tl