Ministru Justisa Sérgio Hornai Sei Asina Tratadu Estradisaun ASEAN nian

Ministru Justisa, Sérgio de Jesus Fernandes da Costa Hornai. Imajen/Rafa.tl

DILI, RAFA.tl– Governu liuhosi Konsellu Ministru iha Palásiu Governu, Kuarta (15/10/2015),  desídi hodi fó podér tomak ba Ministru Justisa, Sérgio de Jesus Fernandes da Costa Hornai, hodi asina Tratadu Estradisaun ASEAN nian, instrumentu jurídiku ne’ebé ho objetivu atu reforsa kooperasaun jurídika entre Estadu- Membru sira iha kombate krimi transnasionál.

Notísia Relevante: Governu Aprova Rekizitu Dezignasaun no Garantia Kontinuidade Pontu Fokál Timor-Leste Nian Ba ASEAN

Tratadu ne’e estabelese prinsípiu no prosedimentu ba entrega resíproka hosi ema sira ne’ebé buka ba efeitu akuzasaun, julgamentu ka kumprimentu pena, define infrasaun sira ne’ebé sujeitu ba estradisaun, kondisaun obrigatóriu no diskrisionáriu sira, no fundamentus ba rekuza, no mós garantia prosesual no umanitária sira ne’ebé aplikável.

Komunikadu imprensa ne’ebé Rafa.tl asesu husi Média Prezidénsia Konsellu Ministru, haktuir iha reuniaun Konsellu Ministru ne’e mós, aprova ona projetu Rezolusaun Governu nian, ne’ebé aprezenta mós husi Ministru Negósiu Estranjeiru no Kooperasaun, ne’ebé aprova Akordu entre Governu Repúblika Demokrátika Timor-Leste no Governu Repúblika Populár La’os nian kona-ba Troka Direitu Utilizasaun Rai no Edifísiu husi Misaun Diplomátika sira.

Akordu, ne’ebé assina iha Vientiane, iha loron 8 fulan-outubru tinan 2024, ho objetivu atu hametin relasaun amizade no kooperasaun entre nasaun rua, hodi garante kondisaun adekuadu ba funsionamentu hosi sira ida-idak nia misaun diplomátiku sira, bazeia ba prinsípiu resiprosidade no tuir Konvensaun Viena nian kona-ba Relasaun Diplomátika no Konsulár nian.

Tuir Akordu ne’e, Governu La’os fó ba Timor-Leste direitu atu utiliza rai pedasuk ida no edifísiu ne’ebé lokaliza iha Vientiane, enkuantu Governu Timor-Leste fó direitu ba La’os atu utiliza rai pedasuk ida no edifísiu rua ne’ebé lokaliza iha Avenida de Portugal, iha Farol, Díli, ba objetivu hanesan.

Direitu utilizasaun nian sei válidu ba períodu tinan 70, ne’ebé bele estende liuhosi akordu mútua, no imóveis ne’ebé iha kestaun sei hetan izensaun hosi impostu no taxa, hanesan prevé ona iha padraun internasionál ne’ebé aplikável no prinsípiu resiprosidade nian. Akordu ne’e mós estabelese katak rai no edifísiu sira sei utiliza de’it ba objetivu diplomátiku, no labele transfere ka fó ba ema seluk bainhira laiha konsentimentu hosi parte seluk.

Reportajen Ekipa Rafa.tl