PNTL Asegura Sigaru Marlboro Ilegál Karton 389

PNTL Munisípiu Covalima prende sigaru ilegál karton 389. Imajen/Média PNTL

DILI, RAFA.tl – Polísia Nasionál Timor-Leste (PNTL) Munisípiu Covalima no Unidade Polísia Marítima (UPM) liu husi operasaun konjunta asegura  sasan ilegál hanesan sigaru karton 389 ne’ebe tula ho vero haat, ne’ebé deskonfia hatama husi sidadaun estranjeiru balun iha área tasi ibun, Aldeia Coloama, Suku Kasabauk Postu Administrativu Tilomar, Munisípiu Covalima.

Notísia Relevante: Empreza Seagull Resort Loke Jogu Online iha RAEOA Ilegál

Portavós Komandu Jerál PNTL, Superintendente Polísia, João Belo dos Reis hateten,  PNTL Munisípiu Covalima ho nia ekipa  deteta tranzasaun ilegál no  halo kedas atuasaun hodi prende sigaru ilegál  ho marka Marlboro hamutuk karton 389, ne’ebe deskonfia hatama husi sidadaun estranjeiru ho nasionalidade Xina.

“Purvolta tuku 02:00 madrugada Otl,  operasaun konjunta deteta movimentu iha tasi-ibun parte Kasabauk nian, ne’ebé deskonfia iha tranzasaun ilegál no bazeia ba informasaun ne’ebé koleta husi intervensaun deteta sidadaun estranjeiru ho nasionalidade Xina, importa sasan ilegál mai ho ró, depois transfere ba ró ki’ik sira, hodi transporta mai iha tasi-ibun, husi ne’e polísia deteta sigaru hamutuk kaixa ka karton 389, ne’ebé prende karreta ida ho vero haat,” Superintendente João Belo dos Reis ba Jornalista sira iha Sala Konferensia Imprensa Kuartél Jerál PNTL, Tersa (07/10/2025).

Superintendente Polísia ne’e hatutan, husi tranjaksaun ilegál ne’e, polísia mós asegura karreta ida no motorizada balun ne’ebe sidadaun sira soe hela. Maibé, Polísia foti ona prosesu evidensia sira ne’e hodi rejista ho Numeru Uniku Krime  0319/25/PNSIC hodi submete ba Ministériu Públiku hodi halo prosesu.

“Suspeitu sira halai hotu  agora  prosesu investigasaun la’o hela,  ita tenta atu bolu sira ne’ebé motór ho karreta  nain ne’ebé para hela iha ne’ebá, hodi husu sira nia responsabilidade, maibé  prosesu  investigasaun sei la’o,  espera orsida loraik ita bele submete ba Ministériu Publiku,” Superintendente João Belo dos Reis hateten.

Dadaun ne’e Polísia asegura ona evidénsia sigaru ilegál  ne’e ba iha PNTL Munisípiu Covalima, hodi sai evidénsia atu intrega ba Ministériu Públiku, no mós hodi hein despaixu husi Ministériu Públiku atu asegura sidadaun sira ne’ebe inporta sigaru ne’e.

Reportajen ekipa Rafa.tl