Ministru Interiór “Ameasa” Hasai Membru CSP Fasilita Kilat ho Pistola Ba Sidadaun Estranjeiru Treinu Tiru

Membru CSP ne'ebé fasilita kilat ho pistola ba sidadaun estranjeiru treinu tiru, foin lalais ne'e, no virál iha média sosiál. Imajen/Repro Espesiál

DILI, RAFA.tl –  Ministru Interiór (MI),  Francisco da Costa Guterres, hatete kona-bá membru Korpu Seguransa Pesoál (CSP, sigla portugés) ne’ebe fó kilat ho pistola ba sidadaun estranjeiru hodi treinu tiru iha ona prosesu investigasaun no sei lori ba Ministériu Públiku to’o Tribunál atu halo julgamentu.

Notísia Relevante: PNTL Suspende Membru CSP Ne’ebé Fó Kilat ho Pistola Ba Sidadaun Estranjeiru

Ministru Francisco da Costa Guterres afirma bainhira iha rezultadu hatudu membru CSP ne’e komete duni krime, sei foti medida hasai ka demite husi Polísia.

“Ita haree lai nia investigasaun ne’e, ne’ebé ita mós kaer prinsípiu prezunsaun inosénsia.  Kuandu ema ne’e seidauk to’o iha julgamentu finál, ita seidauk konsidera nia sala tiha ona, kuandu ikus liu maka nia sala duni, komete krime, hakarak ka lakohi sei foti medida hasoru nia. Tanba iha lei regulamentu desiplinár Polísia nian koalia tiha ona, medida lubuk ida foti hasoru nia,” Ministru Francisco da Costa Guterres ba jornalista sira iha Kuartél Jenerál F-FDTL, Fatuhada, Dili, Sesta (03/10/2025).

Nia hatutan parte Komandu Jerál PNTL  aplika ona suspensaun preventiva ba membru CSP ne’e hodi submete prosesu investigasaun, nune’e parte Ministériu Interiór hamutuk ho PNTL halo hela investigasaun, ne’ebe prosesu ne’e labele adianta liu.

Bainhira jornalista sira konfirma ho Ministru Interiór kona-bá informasaun ne’ebe espalla iha publiku katak membru CSP ne’e ezekuta  orden husi Diretór Servisu Nasionál Intelijénsia (SNI), Longuinhos Monteiro, hodi ba iha fatin karega tiru iha Kaitehu Munisípiu Liquiça, Ministru Interiór Francisco da Costa Guterres, hateten iha hela prosesu investigasaun no labele pronúnsia buat ruma hodi hakat liu fali prosesu ne’ebé iha.

“Ha’u labele ko’alia liu tanba prosesu ne’e iha hela investigasaun nia laran, se lae ita intervein fali prosesu investigasaun ne’e, ema balun dehan iha intensaun polítika halo buat ne’e, ha’u lakohi ko’alia. Kazu ne’e la’ós ona iha Ministériu Interiór no la’ós ona iha SNI, maibe ne’e iha ona Ministériu Públiku,” nia esplika.

Antes ne’e, Portavós interinu Komandu Polísia Nasionál Timor-Leste (PNTL), Superintendente Polísia Moizinho Coreia, ba jornalista sira iha Ministériu Interiór hateten, membru CSP ne’ebé fasilita sidadaun Xinés ho arma hanesan kilat ho marka M-Five (M5) no Pistola Glock 19 hodi treinu iha fatin tiru Kaitehu, Komandu PNTL hola ona medida hodi fó suspensaun durante loron 30 no kazu ne’e rasik submete ona ba Ministériu Públiku hodi halo prosesu tuir mai.

Reportajen ekipa Rafa.tl