PNTL Suspende Membru CSP Ne’ebé Fó Kilat ho Pistola Ba Sidadaun Estranjeiru

Sidadaun estranjeiru ho nasionalidade Xina utiliza kilat hodi treinu tiru iha fatin instalasaun treinu tiru nian iha área Kaitehu, Liquiça, foin lalais ne'e. Imajen/Repro.Espesiál

DILI, RAFA.tl– Komandu Polísia Nasionál Timor-Leste (PNTL) suspende ona membru Korpu Seguransa Pesoál (CSP, sigla portugés) ne’ebé fó kilat ho marka M-Five (M5) ho Pistola Glock-19 ba sidadaun estranjeiru ida ho nasionalidade Xina hodi treinu tiru iha área Kaitehu, Postu-Administrativu Bazartete, Munisípiu Liquiça.

Iha informasaun ne’ebé Rafa.tl asesu, Kinta (02/10/2025) katak, sidadaun estranjeiru ne’ebé mai hosi nasaun Xina no hanesan emprezáriu ka rikasu ida ne’ebé tama iha territóriu nasional Timor-Leste  ho aviaun Zet Privadu atu halo investimentu no halo mós belun diak ema importante balun.

Membru CSP ne’ebe fó kilat no pistola ba Xinés ne’e hodi treinu tiru iha loron 15 fulan-Setembru liubá iha fatin treinamentu ba tiru ne’ebé lokaliza iha área Kaitehu.

Portavóz PNTL Interinu, Superintendente Polísia Moizinho Coreia, rekoñese katak, membru CSP balu fó kilat ba sidadaun estranjeiru hodi tuir treinu tiru.

Nia afirma membru CSP ne’ebé fasilita sidadaun Xinés ne’e, komandu hola medida hodi fó suspensaun durante loron tolu-nulu no kazu ne’e rasik submete ona ba Ministériu Públiku, hodi halo prosesu tuir mai.

“Ha’u hanoin loos duni katak, virál iha média sosiál iha vídeo ida ne’ebé deskonfia katak, iha involvimentu membru CSP ida husi PNTL ne’ebe fó arma ba sidadaun estranjeiru balu hodi tiru,”  Superintendente Polísia Moizinho Coreia,  hateten ba jornalista sira iha salaun Ministériu Interiór, Dili.

Nia hatutan, komandu PNTL toma ona atensaun hodi fó medida loke prosesu investigasaun ba membru CSP ne’ebé  ne’ebe Polísia rasik seidauk fó sai nia identidade no inisiál.

“Kona-ba ida ne’e, prosesu la’o hela, se-se mak involve ami sei haree, pelumenus semana oin hanesan ne’e bele update ba ita-boot sira,” nia hateten.

Bainhira jornalista sira konfirma ho portavóz  PNTL interinu ne’e kona-bá informasaun ne’ebe espalla  katak, membru CSP ne’e simu ordem Diretór Servisu Nasionál Intelijensia, Superintendente Polísia Moizinho Coreia hateten kuandu prosesu la’o ne’e, se-se deit mak hola parte iha krime ida, klaru katak, komandu PNTL sei bolu hotu hodi halo investigasaun.

“Ha’u seidauk hatete katak, aktu husi membru CSP, ami sei halo investigasaun, prosesu sei la’o. Se deit involve iha krime ida sei investiga hotu,” nia afirma.

Nia dehan, iha nasaun Timor-Leste iha instituisaun tolu hanesan PNTL no F-FDTL no PCIC mak kaer arma, nune’e klaru katak, fasilita kilat ne’e husi membru CSP PNTL nian ida.

Reportajen ekipa Rafa.tl