PNTL Identifika Suspeitu Sunu Karreta Estadu

Karreta Estadu marka Fortnuner ne'ebé suspeitu sunu, Tersa (16/09/2025). Imajen/Rafa.tl

DILI, RAFA.tl– Polísia Nasionál Timor-Leste (PNTL) liuhosi Departamentu Investigasaun Kriminál Nasionál (DIKN) halo ona identifikasaun bá suspeitu ne’ebé sunu karreta Estadu ho marka Fortuna iha resintu área Caicoli, besik Liçeu Universidade Nasionál Timor Lorosa’e (UNTL).

Notísia Relevante:Manifestasaun Bá Loron-Rua iha Dili, Sunu Karreta Estadu Ida no Polísia Detein Na’in-Haat 

Diretór Departamentu Investigasaun Kriminál Nasionál (DIKN), Superintendente Polísia, João Belo dos Reis, hateten Polísia identifika ona suspeitu ida ne’ebé sunu karreta estadu iha ámbitu asaun manifestasaun Estudante Universitáriu Timor-Leste (EUTL),  Tersa (16/09/2025).

Hafoin PNTL halo identifikasaun ba suspeitu ne’ebé  sunu karreta marka Fortnuer ne’ebé para hela iha área eskola Liceu nia oin, iha kalan ne’e kedas haruka nia fila hodi hein prosesu sira tuir mai.

“Autor ida ne’ebé suspeita ba sunu karreta ne’e PNTL identifika ona nia naran pesoal, nia kontribui tebes tanba la’ós ona fragante delitu ita haruka fila hodi hein prosesu tuir mai,” João Belo dos Reis hateten bá jornalista sira, Kuarta (17/09/2025).

Manifestasaun pasífiku ne’ebé Estudante Universitáriu Timor-Leste (EUTL) organiza hamutuk ho sosiedade sivíl hodi eziji ba membru  Parlamentu Nasionál atu hapara sosa karreta no mós halo alterasaun bálei pensaun vitalisia.

Iha manifestasaun pasífiku ne’ebé tama ona ba loron datoluk ne’e Polísia Nasionál Timor-Leste kaptura ona manifestante hamutuk na’in-12 (sanulu-resin-rua) tanba deskonfia perturba orden sosiál ka orden públiku hodi hamosu asaun anarkismu.

Diretór DIKN ne’e informa mós katak, iha loron dahuluk manifestasaun, Polisia kaptura ema nain-tolu (3) no iha manifestasaun daruak nian Polisia kaptura tan ema nain-sia (9) hodi nune’e hamutuk nain-12 (sanulu-resin-rua).

Superintendente Polísia ne’e haktuir iha manifestasaun ne’e autoridade hetan kanek hamutuk nain-lima (5); iha manifestasaun dahuluk membru PNTL ida mak kanek no iha segundu manifestasaun nain-rua (2) mak kanek no ba loron datoluk nian nain-rua (2) tan.

“Iha mós  manifestante sira balu hetan kanek ne’ebé buat sira ne’e hotu investigasaun kriminal sei halo prosesu hotu,” nia hateten.

PNTL hakarak apela ba manifestante sira katak liberdade espresaun atu hatoo ideia ka hanoin kritika sira ne’e garantidu iha Konstituisaun Repúblika Demokrátiku Timor-Leste nian no lei sira, maibé husu ba estudante, juventude no sosiedade sivíl sira atu manifesta sira nia hanoin no kritika ho dalan konstrutivu hasoru órgaun soberanu sira.

“Kuandu halo manifestasaun uza parte terseiru tama hodi estraga ita-boot sira nia manifestasaun, ne’e estadu Timor-Leste mak naran aat no manifestante rasik bele submete ba prosesu investigasaun kriminal,” Superintendente Polísia, João Belo dos Reis hateten.

Iha observasaun Rafa.tl nian iha terrenu haree katak, tama ba loron datoluk manifestasaun pasífiku ne’ebé halo iha resintu Parlamentu Nasionál nia oin no areadores Universidade Nasionál Timor Lorosa’e (UNTL) nian katak autoridade seguransa no manifestante sira koopera diak no haree katak estudante sira maiória kumpre sira nia dever hodi hato’o sira nia direitu ba manifestasaun no hatoo sira nia opiniaun ba ezijénsia ne’ebé iha.

Situasaun iha terrenu hatudu Segundu Komandante Jerál PNTL Pedro Belo tuun direita bá konsola manifestante sira atu kontinua respeita orde públika hodi evita hamosu anarkismu.

Reportajen ekipa Rafa.tl