Parlamentu Nasionál Kansela Ona Sosa Karreta Bá Deptadu 65 Votu Unanimidade

Manifestante sira sunu Karreta Estadu ida iha área Caicoli, Dili, Tersa (16/09/2025). Imajen/Rafa.tl

DILI, RAFA.tl– Parlamentu Nasionál (PN), Tersa (16/09/2025),  aprova ho unanimidade rezolusaun Parlamentár númeru 65/2025 hodi kansela sosa karreta foun bá deputadu na’in-65 ho votu á-favor 57, kontra zero no no abstensaun zero.

Notísia Relevante: Bankada CNRT, PD no KHUNTO Deklara Kansela Sosa Karreta Bá Deputadu 65

Vise-Prezidente Bankada CNRT, Patrocínio dos Reis Fernandes iha nia intervensaun hateten, atu kontínua ho pozisaun polítika ne’ebé Segunda liubá fó sai ona bá públiku no Tersa ne’e CNRT hakarak atu konsistente hodi formaliza pozisaun ida ne’e liu husi rezolusaun tanba ne’e maka mai aprezenta.

“Ami iha ne’e atu hanoin katak, aprezenta bá meza atu delibera tanba plenária nia desizaun maka vinkula bá prosedimentu sira ne’e hotu,” Deputadu Patrocínio dos Reis Fernandes afirma.

Membru PN husi Bankada  FRETILIN, Antoninho Bianco hateten ho aspirasaun sira ne’ebé iha liuhosi manifestasaun Estudante Universitáriu Timor-Leste (EUTL) la presiza dada kleur, rejistrasaun emerjénsia tenke rezolve emerjénsia, tanba ne’e maka ajenda laiha maibé Bankada FRETILIN mós pronúnsia ona atu aprezenta projetu rezolusaun ida ne’e.

“Tempu ona, ita iha konsensu ida para atu bele hasai rezolusaun tanba situasaun ne’e ita tenke konsensu duni, fiar aan deit labele, tenke fiar malu, hamutuk halo mudansa,” Deputadu Antoninho Bianco hateten.

Prezidente Bankada PLP, Deputada Maria Angelina Lopes Sarmento hateten buat seluk ne’ebé presiza hanoin mós maka, altera lei pensaun vitálisia ho lei manifestasaun.

CNA seidauk iha kontratu ho empreza sira atu sosa karreta ba deputadu nain-65

Ministériu Planeamentu no Investimentu Estratéjiku (MPIE), Gastão de Sousa deklara, Komisaun Nasionál Aprovizionamentu (CNA) seidauk iha kontratu ho empreza ruma hodi sosa karreta ba deputadu nain-65 iha mandatu VI Lejislatura nian.

Ministériu Planeamentu no Investimentu Estratéjiku (MPIE), Gastão de Sousa bá jornalista sira iha nia servisu fatin Fatuhada, Tersa (16/09/2025), hateten deklarasaun ne’ebé partilla iha públiku katak karreta bá Deputadu no Deputada sira iha ona dalan ne’e laloos ida.

Nia esplika CNA halo prosesu aprovizionamnetu de’it, CNA la deside karreta ne’e atu hola ka la hola, CNA halao deit servisu bá prosesu aprovizionamnetu para atu hola karreta, desizaun iha Parlamentu Nasionál no Parlamentu Nasionál ne’e orgaun soberania ketak ida.

Prosesu sosa karreta ne’e  agora dadaun sei iha faze Pos-kualifikasaun, signifika manán na’in iha lista númeru ida too haat ne’e iha ona, sei ba haree sira iha kapasidade atu sosa karreta ka lae, tanba iha ne’ebá sei iha buat barak, ne’ebé presiza haree, sira iha ofisina ka lae no saida-saida ne’ebé presiza tetu hotu, molok hakat bá faze sira tuir mai.

“Prosesu agora iha pos-kualifikasaun hela, ha’u sei hein relatóriu finál, karreta seidauk sosa, seidauk iha kontratu ida  asina, manán na’in mós seidauk hatene sé,” Ministru Gastão de Gastão informa.

Ministru MPIE ne’e hatutan, se Parlamentu Nasionál deside kansela tenke haruka karta mai para MPIE liuhosi CNA kansela, prosesu sira labele kansela de’it. Tanba ne’e, atu hato’o ba públiku mak ne’e, seidauk iha manán nain, se manán na’in seidauk iha, kontratu seidauk iha.

Sekretáriu-Jerál PN sei formaliza

Sekretáriu Jerál Parlamentu Nasionál, Edgar Sequeira Martins hateten Segunda liubá Bankada CNRT, PD ho KHUNTO fó sai  ona husi média kona-bá akizisaun karreta foun ba Parlamentu ninian, kansela prosesu akizasaun karreta.

Nia hatutan akizasaun sosa karreta seidauk finál iha hela prosesu Aprovizionamentu besik hotu, ne’ebé prosesu Aprovizionamentu seidauk finál, signifika karreta seidauk sosa, karreta mós seidauk mai, aprovizionamentu mós seidauk finál  no kompañia mós seidauk iha kontratu,  katak karreta seidauk mai.

“Tempu badak atu fó kontinuidade deklarasaun husi Bankada sira ita sei lori matéria ida ne’e ba iha Konsellu Administrasaun, mais sedu posivel parese Tersa dader ita sei konvoka konsellu administrasaun, para hodi bele deskute kona-bá akizasaun sosa karreta. Ita iha Konsellu administrasaun iha reprezentante Bankada sira hotu iha ne’ebá no mós deskute sei formaliza deklarasaun ne’ebé maka Bankada sira hato’o,” Edgar Sequeira Martins hateten.

Sekretáriu Jerál  PN ne’e informa iha Konsellu Administrasaun iha Bankada lima, entaun sei deside no formaliza deklarasaunpPolitika maibé administrativamente aban Konsellu Administrasaun sei formaliza ida ne’e depois   sei lori bá iha plenária PN hasai rezolusaun ba kanselamentu akizasaun viatura.

Edgar Sequeira Martins, afirma liutan katak, kompañia manan nain mós seidauk públika agora internamente seidauk no juri sira ninia serbisu iha ne’ebá sira kontaktu kompañia sira ne’e sira kontaktu internal juri sira nian, maibé formálmente seidauk anúnsia bá públiku kompañia manan na’in maka A, B ka C ne’e seidauk.

Parlamentu Nasionál liuhosi debate Orsamentu Jerál Estadu bá tinan 2025, aloka ona orsamentu ho montante millaun US$4,2 atu sosa karreta foun unidade 65 hodi fasilita mobilidade no serbisu deputadu sira iha lejislatura da-neen.

Reportajen ekipa Rafa.tl