Autoridade Timor-Leste Identifika Ró Ida husi Vietnam Tula Simente Laiha Dokumentu Kontratu Ofisiál

Autoridade Timor-Leste halo identifikasaun bá Ró Tong Yang Fu Rui husi Vietnam ne'ebé tula simente mai Timor-Leste laho dokumentu ofisiál ka bill of lading. Imajen/Rafa.tl

DILI, RAFA.tl—Autoridade Timor-Leste, Kuarta ne’e, halo inspesaun bá ró  Tong Yang Fu Rui husi Vietnam  ne’ebé identifika transporta simente mai Timor-Leste, maibé laiha dokumentu  kontratu ofisiál ka  Bill of Lading (B/L).

Bill of Lading (B/L) maka dokumentu ofisiál ida bá ró internasionál ne’ebé fó sai hosi transportadór (ezemplu, empreza ró nian) bá ró-na’in.

Funsaun prinsipál sira husi bill of lading maka prova simu sasán → transportadór rekoñese simu sasán hosi karregador ba aremesa, prova kontratu transporte nian → serve hanesan akordu entre karregadór no transportadór kona-bá termu sira karregamentu nian (rota, destinu, nst), dokumentu titularidade (titulu sasan) → se deit mak kaer B/L orijinal konsidera iha direitu ba sasan iha portu destinu.

Autoridade Timor-Leste kompostu husi  FALINTIL-Forsa Defeza Timor-Leste (F-FDTL), liu husi Komponente Naval, Polísia Nasional Timor-Leste (PNTL) Diresaun Servisu Investigasaun Kriminál (DSIK) ho Unidade Polísia Marítima (UPM) no Alfándega ka Autoridade Aduaneira, Tersa ho Kuarta ne’e, halo idetifikasaun bá ró Tong Yang Fu Rui husi Vietnam ne’ebé atraka hela iha tasi klaran besik Portu Dili tula simente, maibé halo duvida tanba laiha dokumentu bill of lading.

Kapitaun Portu Díli, Tenente Raul Correia ba jornalista sira iha Portu Díli, Kuarta (10/09/2025), informa, prosesu investigasaun lao hela husi Diresaun Servisu Investigasaun Kriminál (DSIK) sira haree ida ne’e ba oin sasan atu hatun ka la hatun.

Kontinuasaun prosesu inspesaun konjunta konsege lori crew no kapitaun ró Tong Yang Fu Rui nian ho nia xefe enjeñeria mai iha Portu Díli hodi verifika informasaun ho ajénsia nune’e mós nain bá sasan.

“Bill of Lading ne’e ita hatene katak, ne’e dokumentu sira ne’ebé mak importante katak ró ida tula sasán husi ne’ebá mai nia tenke haruka uluk ona Bill of Lading mai iha Ajénsia,” Tenente Raul Correia hateten.

Crew  sira Ro Tong Yang Fu Rui husi Vietnam  hamutuk  ema na’in-10,  kompostu husi na’in-ualu (8) husi Indonézia no na’in-rua  (2) husi Xina.

Reportajen Ekipa Rafa.tl