PNTL Garante Seguransa Másimu iha Misa Agradesimentu Tinan-ida Vizita Papa Francisco iha Tasi-Tolu

Komandante PNTL Munisípiu Dili, Superintendente Xefe Polísia, Orlando Gomes. Imajen/Rafa.tl

DILI, RAFA.tl–Polísia Nasionál Timor-Leste (PNTL), liu husi Komandante Komandu Operasaun Interinu, Superintendente Xefe Polísia, Justinho Menezes, Tersa (09/09/2025), konvoka reuniaun ho Komandante Komandu PNTL Munisípiu Dili ho Komandante Unidade Espesiál Polísia (UEP) hodi garante seguransa iha missa agradesimentu tinan-ida vizita Papa Francisco iha Timor-Leste.

Notísia Relevante: Hanoin Hikas Papa Francisco iha Timor-Leste, Sei Hala’o Misa Agradesimentu no Konsertu “Joven Barullu” iha Tasi-Tolu

Komandante Munisípiu Dili, Superintendente Xefe Polísia, Orlando Gomes, bá jornalista sira iha Komandu PNTL Caicoli,  Dili, hateten, Polísia  Nasionál  Timor-Leste (PNTL), preparadu ona atu garante seguransa bá selebrasaun misa tinan ida vizita Maktoban Sua Santidade Papa Francisco mai Timor-Leste ne’ebé sei halo iha Tasi-Tolu.

“Ami halo enkontru, no breafing ona bá membru sira, ita hotu-hotu sei apoia másimu iha Misa iha Tasi-Tolu. Ita garante selebrasaun ne’e sei la’o di’ak, movimentu ita-nia sarani sira iha Kapitál Dili no mós sarani sira husi munisípiu seluk ne’ebé mak mai iha kapitál Dili mós la’o ho di’ak no organizadu,” n Superintendente Xefe Polísia, Orlando Gomes hateten.

Komandante PNTL Munisípiu Dili ne’e esplika, atu garante seguransa durante selebrasaun Misa agradesimentu tinan-ida vizita Papa Francisco iha Timor-Leste, Komandu PNTL Munisípiu Díli hetan apoiu husi  Unidade Espesiál Polísia (UEP) ho  Unidade Polísia Maritima (UPM).

Nia hatutan parte seguransa mós halo ona identifikasaun bá fatin sira, liu-liu bá parajen bá sarani sira ne’ebé husi munisípiu, atu mai partisipa  misa iha Tasi-Tolu.

Bá sarani sira husi parte Oeste sira sei mai konsentra iha Pelican Paradise. Sarani sira husi parte Leste sei okupa Tasi-Tolu no mós kampu Aeroportu nian, atu nune’e husik dalan luan  atu ema bele halo movimentu bá-mai ho livre inklui transporte mós bá-mai ho livre.

“Ita garante sei halo servisu ho di’ak, tuir orden no kontrola movimentasaun transporte ho di’ak, tanba polísia tránzitu Dili  kordena ona ho Tránzitu Nasionál atu kontola dalan sira, nune’e transporte bele la’o normal,” Nia subliña.

Enkontru ne’e fó mós orden, hodi halo monitorizasaun bá movimentu estudante, atu antisipa demonstrasaun no garante estabilidade seguransa, bá rezidénsia Korpu Diplomátika no kontrola movimentu joventude sira.

Partisipa iha enkontru ne’e, Komandante PNTL Munisípiu Dili, Superintendente Xefe Polísia, Orlando Gomes, Diretúr Diresaun Servisu Tránzitu Seguransa Rodoviariu, Superintendente Xefe Polísia, Antoninho Mauluta, Komandante Unidade Espesial Polísia, Superintendente Polísia, Damião Correia, Xefe Operasaun Komandu PNTL Munisípiu Dili, Superintendente Assistente Polísia, Luis Amaral no Departamentu Unidade sira  iha Kuartel Jerál PNTL.

Reportajen ekipa Rafa.tl