Jogu Online Sei Hamosu Esplorasaun no Esploitasaun iha Sosiedade

Komunidade asesu jogu online. Imajen/ANTARA

DILI, RAFA.tl– Jogu online ne’ebé Governu Timor-Leste liuhosi Inspesaun Jerál bá Jogu (IGJ) fó autorizasaun hodi loke sira-nia atividade iha Timor-Leste sei hamosu prátika esplorasaun no esploitasaun maka’ás iha sosiedade bá futuru.

Notísia Relevante: Timor-Leste Rejista Jogu Online Hitu, FM Preokupa Impkatu Negativu Bá Sosiedade

Dadus husi Inspesaun Jerál  bá Jogu (IGJ), daudaun ne’e, rejista jogu online hamutuk hitu (7) mak hala’o atividade legál iha Timor-Leste.

Husi jogu online hitu ne’e la inklui ho jogu sira hanesan lotaria, dragon, Kiss, Rudal, Amizade, Timor-Poll, Toto-Ftiun no slot machine  MDG Holding, Timor Holding no Unlong Unipessoal, Lda.

Diretór ezekutivu Luta Hamutuk, José Alves da Costa, bá jornalista Rafa.tl iha resintu Asosiasaun HAK, iha  Farol, Dili, Kuarta (03/09/2025),  hateten jogu online sira ne’ebé daudaun ne’e governu fó lisensa iha Timor-Leste hanesan halo esplorasaun no esploitasaun, no fatin sira jogu iha bá ne’e iha tendénsia bá krime bainhira Polísia Siéntifika Investigasaun Kriminál (PCIC, sigla portugés) no Komisaun Anti-Korrupsaun (CAC, sigla portugés) la halo investigasaun kle’an bá asuntu hirak ne’e.

José Alves da Costa  afirma jogu online ne’e di’ak liu prevene ka hapara, tanba ida-ne’e fó esperansa mamuk no bele sai meus ida atu haboot tan korrupsaun iha instituisaun públiku sira, tanba mesak ministru, deputadu  no kargu xefia sira iha órgaun Estadu mak kalan-kalan bá joga, entaun sira susar atu hanoin povu nia susar bá futuru, maibé hanoin bá sira nia lakon ne’ebe sira joga.

Parte Sosiedade Sivíl mos konsidera katak, jogu online ne’e bainhira lakon sei frustasaun no bele sai naokten no halo ema sai kriminozu no bele halo nasaun ne’e sai nasaun failadu.

“Jogu online sira ne’e rasik sei fó impaktu ba komunidade, liu-liu ba foin-sa’e sira nia pensamentu tanba kampu traballu bá sira laiha, ho ida-ne’e sira nia hanoin liuhosi jogu online ne’e mak bele manan, maibe finalidade lakon sira bele halo krime no sai naokten atu bele iha kondisaun ba joga,” José Alves da Costa hateten.

Tuir sosiedade sivil nia haree, jogu online ne’e laiha benéfisiu bá sidadaun no foin-sa’e sira, tanba ne’e Governu tenke iha polítika ida dia’k, investe iha área edukasaun formal no informal bá foin-sa’e sira, atu nune’e, bainhira foin-sa’e sira ne’ebé remata ona sira-nia eskola, sira laiha kbi’it atu kontínua eskola.

“Agora ema mai loke restorante nia maluk Indonézia mak tuir mai fase-bikan, Xina sira mai loke loja ki’ikoan nia maluk mak mai faan, ita mak ba dasa sira nia rai, tan ne’e tenke haree fali lei sira-ne’e para oinsá fó oportunidade bá ita-nia foin-sae sira, atu iha kampu serbisu,” nia tenik.

Iha Sábadu, 24 fulan-Maiu 2025, Inspesaun Jerál bá Jogu atribui lisensa no ofisiálmente lansa indústria jogu online ida iha Timor-Leste ne’ebé opera  husi empreza KAPSTAAD Unipessoal Lda ho nia parseiru   TogoEuro Exim Gaming.

KAPSTAAD Unipessoal Lda ho nia parseiru  TogoEuro Exim Gaming introdús uluk jogu sorteiu online lubuk ida ne’ebé inklui variasaun sira hanesan hosi “Seis Bolas”, (Bola neen) tanba aloka entre 56% to’o 76% hosi nia reseita brutu totál ba jackpot ka manan sira, ida-ne’e signifika katak bainhira kliente sira joga Kapstaat – TogoEuro Exim Games beibeik liu, jackpot sira sei aas liu tan deit no jogu Offshore Online Gaming mak hanesan Futu Mano, halai taru kuda, Cripto Currancy no seluk seluk tan ne’ebé prepara hela atu ajuda Timor-Lestse hodi hamosu reseita barak liutan.

Reportajen ekipa Rafa.tl