PAM Dili ho Bobonaro Simu Pose husi Ministru Administrasaun Estatál

Ministru MAE Tomas do Rosario Cabral (klaran) ho PAM Dili, Francisco dos Santos no PAM Bobonaro Paul Moniz Maia. Imajen/Rafa.tl

DILI, RAFA.tl – Ministru Administrasaun Estatál (MAE), Tomas do Rosário Cabral, ofisialmente fó pose bá Prezidente Autoridade Munisípiu (PAM) Dili, Francisco dos Santos ho  PAM Bobonaro, Paul Moniz Maia, iha resíntu Administrasaun Munisípiu Dili,  Segunda-feira, 01 Setembru  2025.

Iha nia diskuru ofisiál, Ministru Administrasaun Estatál Tomas do Rosário Cabral, husu PAM Dili ho  Bobonaro foun períodu 2025-2030 atu tau-matan bá povu nia moris no estabelese programa sira tenke fó prioridade bá dezenvolvimentu.

Ministru Tomas Cabral hatutan prezidente autoridade munisípiu tenke haree asuntu sosiál hodi buka hatene povu vulnarevél loloos na’in hira no liña servisu munisípiu sira tenke trata asuntu sosiál, edukasaun, saúde, agrikultura, jestaun dezastre naturál, jestaun merkadu no turizmu hodi haree difikuldade povu nia moris.

Bá PAM  Dili ho Bobonaro, Tomas Cabral subliña atu kontrola programa dezenvolvimentu integradu munisipál no servisu maka’ás bá dijitalizasaun rejistu populasaun.

Nia dehan,  PAM sira mós buka tau-matan ba programa  merenda eskolár no haree problema saúde  sira, inklui ordena diretór servisu sira.

Prezidente Autoridade Munisipíu Dili,  Francisco dos Santos sei tau prioridade bá programa haat, maka hanesan engarafamentu iha kapitál Dili, inundasaun, dezastre naturál, infraestrutura ekonomia hanesan merkadu no mós problema lixu.

Francisco dos Santos promete halo supervizaun no aplika koima bá abitante sira ne’ebé soe lixu hodi la kumpre regulamentu sira ne’ebé aplikavél.

“Hakarak ka lakohi ha’u sei esforsu bá ida-ne’e para oinsá  atu finaliza ona  lei aplika koima  atu implementa, tanba ita hatene katak ita-nia komunidade sira ne’e, la soe foer sira iha  lixeira, maibé soe fali iha li’ur, nune’e ami husu komunidade iha Dili atu utiliza fatin lixu sira ho di’ak,” Francisco dos Santos hateten.

Prezidente  Autoridade Minisípiu Bobobnaro (PAM) Paul Moniz Maia, sei kontinua servisu ne’ebé maka iha ona no sei tau prioridade bá infraestrutura baziká hanesan estrada no agrikultura.

Munisípiu Bobonaro,  tuir Paul Moniz Maia, poténsia boot ba setór  agrikulutra tanba ne’e nia sei motiva komunidade sira iha Bobonaro servisu maka’ás liután iha área agrikultura nian, maibé presiza mós kondisdaun infraestrutura ne’ebé adekuada.

Prezidente Autoridade Munisípiu Dili Francisco dos Santos troka eis PAM Dili Gregório Saldanha, no Paul Moniz Maia   nu’udár Prezidente Autoridade Minisípiu Bobonaro  troka eis PAM Bobonaro  Alexandrino Pires.

Reportajen Ekipa Rafa.tl