FFTL Aprezenta José Pedro Alves Salazar husi Portugál Nu’udár Treinadór Foun Bá Selesaun Nasionál Timor-Leste

Prezidente FFTL, Nilton Telmo Gusmão dos Santos (klaran) entrega farda bá José Pedro Alves Salazar (karuk) nu'udár treinadór foun selesaun nasionál Timor-Leste ho nia asistente Jaime Coelho (loos). Imajen/Rafa.tl

DILI, RAFA.tl– Federasaun Futeból Timor-Leste (FFTL) ofisialmente aprezenta bá públiku, treinadór selesaun nasionál Timor-Leste foun, José Pedro Alves Salazar  ho nia asistente  Jaime Coelho.

Notísia Relevante: FFTL Termina Kontratu Treinadór Simon Pablo Eliseche

Treinadór ho nasionalidade Portugés ne’e  sai treinadór prinsipál ba ekipa selesaun nasionál Timor-Leste seniór no mós ba ekipa selesaun nasionál Sub-23 ho durasaun kontratu tinan ida.

Prezidente Federasaun Futeból Timor-Leste, Nilton Telmo Gusmão dos Santos, bá jornalista sira iha edifísiu FFTL, Dili, Kuarta (29/08/2025), hateten Federasaun Futeból Timor-Leste termina ona kontratu ho treinadór selesaun nasionál antes ne’e, Simon Pablo Eliseche, tanba ne’e, FFTL liuhosi autorizasaun Komite Ezekutivu buka hikas treinadór selesaun nasionál foun ne’ebé mak atu lidera ekipa selesaun nasionál bá époka ida tuir kontratu ne’ebé iha.

“José Pedro nu’udár treinadór prinsipál hamutuk ho Jaime Coelho nu’udár mós asistente treinadór, ne’ebé maka mai husi Portugál hodi oferese sira-nia disponibilidade atu servisu hamutuk ho FFTL hodi lidera selesaun nasionál, nune’e bele halo mudansa ruma bá selesaun nasionál,” Nilton Telmo Gusmão dos Santos hateten.

Objetivu boot husi FFTL  konvida José Pedro  ho Jaime Coelho atu bele organiza selesaun nasionál no buka meiu atu hetan baze ida forte liu iha futeból, atu bele sai futeból ne’ebé maka kompetetivu.

“Ita-nia objetivu boot liu, atu konsentra iha ita-nia selesaun nasionál senior, ne’ebé foka liubá jogu kualifikasaun AFC Asean Cup, tanba ne’e maka ohin ita hetan ona konkordansia ho treinadór José Pedro, ne’ebé mós hanesan eis jogadór profisionál no ita espera nia sei fó ida di’ak liu bá Timor-Leste,”  Nilton hateten.

Treinadór selesaun nasionál Timor-Leste foun, José Pedro Alves Salazar, hato’o agradese dala ida tán bá Prezidente FFTL ho nia estrutura tomak bá konvite ne’ebé hanesan onra ida atu reprezenta selesaun nasionál ne’ebé iha istória metin ho Portugál.

Husi primeiru momentu ne’ebé haree, José Pedro Alves Salazar hatutan, ho laran haksolok tebes no depois mós hetan akordu ho prezidente  FFTL ho estrutura tomak ne’ebé hasoru hodi foti desizaun.

Nia seidauk bele halo komentáriu kle’an no oi-oin, hodi kompriende didi’ak saida mak prezidente ho estrutura FFTL hakarak, maibé buat barak maka ko’alia ona antes, no hanoin katak sei reprezenta selesaun ida-ne’e, hodi reprezenta nasaun ida no servisu diak liután ba oin.

“Ami iha objetivu atu atinji kualifikasaun ida ne’e. Badala uluk, ami hakarak halo buat ne’ebé di’ak liu, atu hatene katak atu bele liu faze tuir mai, ami tenke manán jogu, maibé ne’e kualifikasaun. Ami sei laiha tempu barak, maibé ami sei haree bá kualifikasaun ho maneira ne’ebé di’ak liu atu prepara bá jogu tolu ne’ebé sei mai,” José Pedro Alves Salazar hateten.

José Pedro Alves Salazar  ho ekipa sei koko atu halo di’ak liu iha kompetisaun hotu-hotu. Agora iha ona kualifikasaun hakarak haree bá oin, tanba jogu ofisiál hahú iha loron 09 fulan-Setembru.

José Pedro sei ko’alia ho prezidente FFTL no haree kondisaun no kondisaun ne’ebé aseitavel iha klube futeból Timorense nia laran, ne’ebé fiar katak posivel, hamutuk ho jogadór timoroan sira ne’ebé iha kualidade, atu tenta halo buat ne’ebé di’ak liu, no sempre di’ak liu, duké buat ne’ebé halo antes.

Reportajen ekipa Rafa.tl