Kandidatu 4.428 Submete Hikas Dokumentu Bá Komisaun Rekrutamentu PNTL

Komisaun Rekrutamentu PNTL 2025 halo konferensia imprensa, Tersa (26/08/2025). Imajen/Rafa.tl

DILI, RAFA.tl–Komisaun Rekrutamentu Polísia Nasional Timor-Leste (PNTL) 2025  simu dokumentu husi kadete hamutuk 4.428 ne’ebé aplika ba vaga PNTL .

Notísia Relevante: Sekretariadu Komisaun Rekrutamentu Ofisialmente Anúnsiu Rekizitu Teste Ba Kandete PNTL

Portavós Komisaun Rekrutamentu PNTL 2025, Superintendente Polísia António da Luz, Tersa (26/08/2025), liuhosi konférensia imprensa iha Akademia PNTL, Comoro, Dili, informa, kandidatu sira ne’ebé mak simu formuláriu hahú husi  loron 05-25 fulan- Agostu ne’e, hamutuk 17.148, sira ne’ebé mak la liu ka la aptu sira nia idade liu no mós altura la to’o hamutuk 4.702.

Superintendente Polísia António da Luz, informa kandidatu sira ne’ebé submete fali ona dokumentu bá pontu fokál iha ida-idak nia munisipiu totál 4.428 ne’e fahe ba kategória tolu;

1. Kategória jerál hamutuk 037
2. Jerasaun Patrióta 835
3. Polísia nia oan 556.

António da Luz  fó hatene bá kandidatu sira katak hafoin  submete dokumentu to’o iha loron 09 fulan-Setembru 2025 no iha loron tuir mai, 10 fulan-Setembru 2025, husi pontu fokál munisípiu sira sei lori dokumentu sira mai entrega  iha sekretriadu atu halo verifikasaun bá dokumentu sira ne’e molok taka sai naran sira kona-bá se mak aptu iha selesaun dokumentu hodi prepara bá prova eskrita.

Komisaun rekrutamentu PNTL 2025 husu ba kandidatu sira prepara material sira hanesan regua, lapis ho medida 2B, apagadór no afiadór hodi partisipa iha ezame eskrita tuir mai.

“Kandidatu sira prepara aan atu tuir ezame eskrita  tanba sistema eliminatóriu no kuidadu mós sira nia saúde no prepara sira nia fiziku tanba ne’e husu ba kandidatu sira tenke prepara aan ho didiak. Selesaun prova kulturál sei halo iha ida-idak nia munisípiu, prova fiziku no sira seluk mak sei hala’o iha Dili,” António da Luz hateten.

Reportajen Ekipa Rafa.tl