Órgaun Liga Kongratula Karketu Dili F.C Kampiaun Liga Timorense Époka 2025

Karketu Dili FC selebra vitória nu'udár kampiaun Liga Futeból Timorense Époka 2025. Imajen/Rafa.tl

DILI, RAFA.tl– Prezidente Órgaun Liga Futeból Timor-Leste (LFTL), Ipolito Soares, lori órgaun liga nia naran hato’o kongratulasaun bá Karketu Dili F.C ne’ebé hetan títulu kampiaun iha Liga Timorense bá époka tinan 2025.

Notísia Relevante: Karketu Dili FC Kampiaun Liga Timorense Époka 2025 iha Jornada da-Ualu

“Obrigadu bá média no kolega sira hotu, liu-liu bá football lover’s sira hotu. Bá dala-uluk, ha’u hakarak kongratulaa Karketu Dili F.C ne’ebé sai kampiaun. Ami  hotu hato’o parabéns bá klube Karketu Dili F.C ne’ebé merese duni sai kampiaun, no parabéns ba povu Timor tomak ne’ebé ita hotu konsege realiza hikas ita-nia liga bá époka ida-ne’e,” Prezidente Órgaun Liga Futeból Timor-Leste (LFTL), Ipolito Soares bá jornalista sira iha estádiu munisipál Dili, hafoin entrega prémiu kampiaun bá Karketu Dili F.C, Sábadu (23/08/2025).

Líder másimu orgaun liga ne’e hatutan, bá liga époka 2025 ne’ebé foin remata, órgaun liga agradese bá apóiu husi Governu no Federasaun Futeból Timor-Leste (FFTL).  Nia rekoñese katak liga époka 2025 la’o deit ho  metade kompetisaun, tanba ne’e bá époka tuir mai, órgaun liga iha ona planu, hamutuk nafatin ho Governu no FFTL para époka tuir mai bele halo full competition ka jogu wome no away hodi kompleta rekizitu sira ne’ebé iha.

Órgaun liga mós sei organiza Super Taxa, no kompetisaun bá terseira divizaun, hodi nune’e, hamoris hikas Liga Futeból Timor-Leste, tuir espíritu ne’ebé iha.

“Tinan ne’e ita sei iha difikuldade ho infraestrutura, liu-liu estádiu ne’ebé obriga ita halo despeza maka’ás, no orsamentu la sufisiente, nune’e, ita halo deit metade kompetisaun, maibé bá tinan oin mak ita-nia orsamentu sufisiente, ita sei halo full competition,” Ipolito Soares. Tenik.

Prezidente LFTL subliña, subsídiu ba órgaun liga epoka ne’e, Governu no FFTL halo ona transferénsia 50% no 50% seluk sei iha prosesu, nune’e hodi bele responde ba subsídiu bá klube sira, inklui kontínua organiza Super Taxa no terseiru Divizaun.

Prezidente Karketu Dili F.C, Luís Oliveira, hato’o agradesimentu bá públiku tomak, liu-liu bá adeptu sira Karketu Dili F.C nian, sosiu, estrutura, jogadór no mós ba ema hotu ne’ebé apoiu.

“Ami kontente ami hetan kampiaun ba dala-haat, ne’e mak ami nia alvu no sei prepara di’ak liután bá epoka oin. Hanesan ami dehan ona Karketu Dili F.C kuandu tuir époka ida sempre iha alvuu atu sai kampiaun,” Luís Oliveira hateten.

Karketu Dili F.C nia ambisaun bá kada époka mak tenke kampiaun, tuir  Luís Oliveira,  ida-ne’e la’ós taka dalan bá klube sira seluk, maibé hanesan atu motiva mós klube sira seluk hodi mai kompete, tanba desportu futeból la’ós polítika, ne’e-duni hotu-hotu hamutuk dezenvolve futeból iha Timor-Leste no lori ba mundu.

“Bá ami jogu hotu-hotu iha époka ne’e la fasil, maibé ho preparasaun, amizade no unidade entre jogadór no treinadór sira, ikus mai, ami hetan kampiaun,” Nia dehan.

Bá oin Karketu Dili FC hakarak atu haree selesaun nasionál ba joga iha li’ur ho di’ak, kompetisaun liga iha ra- laran tenke la’o ho full competition atu nune’e bele iha kompetisaun ida mais forte no jogadór sira hetan esperiénsia no preparasaun di’ak liután ba kompete iha rai-li’ur.

Reportajen ekipa Rafa.tl