Karketu Dili FC Kampiaun Liga Timorense Époka 2025 iha Jornada da-Ualu

Karketu Dili F.C kampaiaun Liga Futeból Timor-Leste Époka 2025. Imajen/JHD

DILI, RAFA.tl–Klubu Primeira Divizaun,  Karketu Dili F.C, save titulu kampiaun Liga Futeból Timor-Leste (LFTL), époka 2025, hafoin iha jornada da-ualu, fahe pontus hanesan ho nia adversáriu Emanuel F.C, ho skor 0-0.

Notísia Relevante: MJDAK “Bandu” FFTL Uza Kampu Futeból iha Munisípiu Bá Atividade Futeból

Klubu Estimadu Sidade Díli  ne’ebé mós hanaran Matak-Malirin ne’e, hahú Liga Futeból Timor-Leste (LFTL) ba períudu 2025 ho seriu no iha ambisaun hakarak sai kampiaun hodi halo kontratasaun ba jogador estranjeiru hamutuk na’in-sia (9) no treinadór estranjeiru ne’ebé iha esperiénsia no matenek atu lídera Karketu Dili F.C.

Alein de jogadór estranjeiru sira ne’ebé Karketu Dili F.C mós estabelese kontratu ba asisténnte treinadór Timoroan sira, inklui kontratu jogadór selesaun nasionál Timor-Leste, ne’ebé iha esperiénsia no abilidade di’ak hodi reforsa ekipa Matak-Malirin ba époka 2025.

Husi preparasaun no ambisaun ne’ebé iha, Karketu Dili F.C hahú jornada da-huluk,  hodi manan nia adversáriu A.D. SLB Laulara, iha jogu abertura ho score 1-0.

Iha jornada da-ruak Karketu Dili F.C, manan nia adversáriu As Marca ho score 4-0 no  hakat ba jornada da-toluk, Karketu Dili F.C, mantein konkista vitóri hasoru nia adversáriu As Ponta Leste ho score 2-0.

Iha jornada da-haat, Ekipa Karketu Dili F.C, kontínua hatudu jogu ida di’ak, no manan nia adversáriu F.C Porto Taibessi ho score 2-0.

Iha jornada da-lima, ekipa Karketu Dili F.C, hatudu liután nia superioridade hodi halakon Academika F.C ho score 7-0.

Iha jornada da-neen, Karketu Dili F.C, obrigadu tenke fahe pontus ho nia adversáriu DIT F.C hafoin ekipa rua impata 0-0.

Iha jornada da-hitu, ekipa Karketu Dili F.C, manan nia adversáriu Assalam F.C ho score 1-0 no iha jornada da-ualu, Karketu Dili F.C, impata 0-0 ho adversáriu Emanuel F.C.

Ho rezultadu husi jogu ualu (8), Karketu Dili F.C rekolla pontu hamutuk 20, no prodús golu 20 no la sofre golu husi adversáriu sira.

Haree ba pontu ne’ebé ekipa Matak-Malirin iha, halo Karketu Dili F.C save titulu kampiaun Liga Futeból Timor-Leste ba époka 2025 iha jornada da-ualu, hafoin adversáriu Emanuel F.C ne’ebé tuur iha pozisaun da-ruak, tabela klasifikasaun rekolla deit pontu 14.

Ho liga époka 2025 ne’ebé iha de’it jornada  sia (9), laiha ona posibilidade ba klube seluk atu duni Karketu Díli F.C ba titulu kampiaun.

Tuir órariu jogu ikus Liga Futeból Timor-Leste  jornada da-sia (9) ba épkoka 2025 ne’ebé atu hala’o iha Estádiu Munisipál Dili iha loron rua tui-tuir malu, kompostu husi Sábadu (23/08/2025), iha jogu rua, iha ne’ebé jogu primeiru sei hala’o entre AS Marca vs Emanuel F.C no segundu jogu ekipa Karketu Dili F.C vs Coração F.C.

Iha loron tuir mai Domingu (24/08/2025), sei akontese jogu tolu (3) kompostu husi jogu rua hala’o iha Estádiu Munisipál Dili, hanesan  jogu primeiru DIT F.C hasoru Academica F.C no jogu daruak AS Ponta Leste vs Assalam F.C.

Entretantu, jogu AD SLB Laularan vs F.C Porto Taibessi sei hala’o iha Estádiu Gleno iha tuku 16:00 oras Timor-Leste.

Ekipa Reportajen Rafa.tl