FFTL La Kontente MJDAK La Hatudu Vontade Di’ak Deskute Reabilitasaun Estádiu Munisipál Dili

DILI, RAFA.tl–Federasaun Futeból Timor-Leste (FFTL) la kontente ho Ministru Juventude, Desportu Arte no Kultura (MJDAK), Nelio Isaac Sarmento, tanba la hatudu vontade di’ak atu deskute prosesu reabilitasaun Estádiu Munisipál Dili  mésmu hetan ona aprovasaun iha Konsellu Ministru.

Notísia Relevante: Fevereiru 2026, Kongresu Eletivu Estrutura Foun FFTL

Prezidene Federasaun Futeból Timor-Leste (FFTL), Nilton Telmo Gusmão dos Santos, liuhosi Konferénsia ba Imprensa iha edifísiu FFTL, Tersa (12/08/2025), klarifika katak pozisaun FFTL nian mantein proposta ne’ebé aprejenta iha reuniaun Konsellu Ministru kona-bá reabilitasaun Estádiu Munisipál Dili no hetan ona aprovasaun husi Konsellu Ministru ne’ebé preside  hosi Primeiru Ministru Kay Rala Xanana Gusmão iha tempu ne’eba.

XI Governu Konstitusionál liuhusi reuniaun Konsellu Ministru iha Palásiu Governu, Kuarta 04 Juñu 2025, aprova ona proposta husi Federasaun Futeból Timor-Leste (FFTL) ne’ebe atu halo reabilitasaun ba Estádiu Munisipál Díli no halo tán konstrusaun foun ba Estádiu ho kampu futsal indoor tuir padraun internasionál iha Tasi-tolu, Dili.

Nilton Telmo Gusmão dos Santos informa dezde desizaun Konsellu Ministru nian tenmpu ne’ebá to’o ohin loron, seidauk hetan komunikasaun formál ruma ho Governu liuhuoi MJDAK, ho nune’e, mantein proposta ne’ebe aprova  ona iha Konsellu Ministru.

FFTL mós halo ona pedidu audénsia ho Ministru MJDAK, Nelio Isaac Sarmento, maibe to’o agora laiha resposta ruma, tanba FFTL hakarak duni atu tuur hamutuk hodi rona rasik hosi MJDAK.

“Klaru desizaun governu nian as liu mak konsellu Ministru, no aprova hakarak hakuak projeitu ne’ebé ami aprejenta ona no ami husi FFTL agradese tebes bá desizaun ne’e, agradese mós bá iha governu ho konfiansa tomak ne’ebé mak fó ona liu husi Konsellu Ministru atu lori projetu ne’e bá oin. Tanba projetu ida ne’e la’ós foin mak ita hanoin ka hakarak atu halo, maibe desde lideransa FFTL uluk  mós iha hanoin atu halo projetu sira ne’e, infelizmente mak ne’e hasoru beibeik dezafius sira hanesan ne’e,”  Nilton hateten.

Lider Ezekutivu FFTL ne’e haktuir mensajen klaru ne’ebé nia simu husi  prezidente sira Federasaun Futeból Internasionál (FIFA), Konfederasaun Futeból Aziátiku (AFC) no mós Federasaun Futeból ASEAN (AFF) husu FFTL halo esforsu hotu, atu nune’e, bele lori futeból fila hikas mai Timor-Leste.

Nósia Relevante: FIFA, AFC ho AFF Husu FFTL Lori Fali Futeból Mai Timor-Leste

Tuir Nilton, futeból labele fila se  laiha infrastrutura ruma, tanba ne’e mak iha reuniaun Konsellu Ministru kuandu FFTL aprejenta projetu ne’e bá ministru hotu-hotu, ne’ebé prezente hotu-hotu aprova katak projetu ida ne’e interesante tebes bá Timor-Leste, tanba ida ne’e mak Governu hakuak projetu ne’e.

“Ami mantein pozisaun hakarak serbisu hamutuk ho Governu atu bele lori ita-nia dezenvolvimentu iha área desportu, espesialmente futeból iha ita nia rain. Tanba ita hatene adezaun ita-nian ba ASEAN, ita sei iha atividade ASEAN lubuk ida no loron ruma sei sai uma nain ba atividade ASEAN nian. Ita presiza infrastrutura sira ne’e, se ita la hahú agora bainhira mak ita hahú, ne’ebé ami kontínua buka meu no dalan hotu, atu aprosima nafatin ita-nia governu hodi bele halo projetu ne’e sai realidade,” Nilton Telmo Gusmão dos Santos hateten.

Nilton Telmo Gusmão dos Santos, atuál Diretór Ezekutivu grupu empreza Esperança Timor Oan (ETO) afirma lideransa FFTL atuál nia misaun mak simplesmente atu transforma mehi ema hotu nian, ba infraestrutura ida apropriadu iha Timor-Leste, atu nune’e, Timor-oan  hotu bele diverte no asiste futeból nu’udár uma-na’in iha nia rain rasik.

Federasaun aprejenta ona proposta hodi bele hetan konsesaun  ba uza rai estádiu Dili, hodi reabilita no hadia kondisaun, atu bele uza ba jogu iha rai-laran, posivelmente kria kondisaun minima sira ne’ebe tuir rekezitu FIFA ho AFC nian atu  Timor-Leste mós bele sai uma na’in ba atividade desportiva rejionál no internasionál.

“Sé MJDAK sente katak projetu reabilitasaun ne’ebé FFTL aprezenta iha porposta ba Konsellu Ministru ne’e tuir loos MJDA pronúnsia buat ruma, atu nune’e hamate tiha ami nia projetu, mas infelizmente iha momentu ne’eba ha’u la haree ida ne’e, maibé buat ne’ebé ha’u haree mak kompromisiu  dehan hakarak apoiu ka suporta inisiativa ne’ebé FFTL aprezenta iha Konsellu Ministru, mas agora sai oinseluk fali, mézmu nune’e ami kontínua hakarak hakbesik ba ita-nia governu atu bele transforma mehi ne’e sai realidade,” Nia subliña.

FFTL hakarak halo reabilitasaun Estádiu Munisipál Dili tanba iha ona kompromisu husi FIFA katak FIFA hakarak apoiu fundu liu husi osan millaun ida (US$1,000,000.00) to’o millaun tolu (US$3,000,000.00). Fundu ne’ebé kleur ona FIFA hakarak atu utiliza hodi rehabilita Estádiu Dili ho montante  $3,000,000.00.

Notísia Relevante: Kongresu Estraordináriu FFTL Bá Dala-XII, Asosiasaun Sira ho Unanimidade Aprova Programa Federasaun Nian

Ho realidade ne’ebé iha, FFTL presiza mak serteza husi MJDAK atu bele informa fila fali ba FIFA no AFC katak Timor-Leste laiha interese ba apoiu ne’ebé FIFA no AFC fó, entaun hakotu ona no husik estadu atu hasai osan estadu nian hodi reabilita Estádiu ne’ebé iha.

Buat ne’ebé FFTL presiza mak akordu konsensaun ba uzu durante períodu tinan 25 entre FFTL ho MJDAK, atu nune’e, bele iha baze legal ida atu hadia Estádiu Munisipál Dili.

MJDAK Prefere Diskusaun Kle’án

Hatán ba preokupasaun FFTL nian ne’e, Ministru Juventude Desportu Arte no Kultura, Nélio Isaac, Kuarta (13/08/2025), hateten FFTL hato’o nia planu ida ba governu dehan iha apoiu orsamentu  US$3,000,000.00 husi FIFA, hodi kontratu aluga rai ba tinan 20 ka 50 nia laran hodi halo no dezenvolve ida ne’e, fatin rua estádiu Munisipál Dili ho ho estádiu Footsal Indoor iha Tasi-tolu, nune’e ideia ne’ebe FFTL hato’o  ne’e Konsellu Ministru konkorda, maibé la’ós konkorda atu halao ona, tenke  halo  diskusaun.

“Estadu nia rai atu entrega ba  ema ida, tenke iha prosesu naruk ida, la’ós tutur fó deit,” Ministru Nelio Isaac Sarmento argumenta.

Nia hateten jogu CPLP foin hotu, agora sei iha hela diskusaun ba Komite Revizaun Orsamentu ka KRO, no bainhira servisu sira ne’e hotu ona mak foin halo reuniaun ho FFTL.

“La bele  jeneraliza buat hotu-hotu, Governu laiha intensaun ba situasaun sira ne’e, tanba MJDAK nia responsabilidade la’ós ba FFTL deit maibe iha atividade lubuk ida ne’ebe presiza tau atensaun,” nia tenik.

“FIFA mós iha interese ba estadium no rai ne’e, no ida ne’e governunian, nune’e ita halo kustu total ne’e hira, FFTL bele tau osan oituan, governu tau osan oituan, depois jestaun bele fó ba FFTL, buat sira ne’e hotu deskute mak atu ko’alia agora seidauk diskute ne’e,” Nélio Isaac hateten.

Nelio Isaac hateten  governu nia interse mak oinsá  atu asegura patrimoniu no infrastrutura hotu-hotu desportu nian ne’e maneja halo didiak ba dominiu públiku, la’ós ba ema ida ka rua nian, ida ne’e mak governu no Ministériu nia hanoin tanba ida ne’e mak kuandu livre ona sei tur hamutuk ho FFTL hodi halo diskusaun liuliu ba estádiu Munisipál Dili.

Reportajen ekipa Rafa.tl