Polísia Sei Aprezenta Reitór ho Nia Dirijente Sira UNTL Bá MP iha Oras 72 Nia Laran

Polísia halo buska no apreensaun ba rezidénsia dirijente balun UNTL nian, Kuarta (06/08/2025). Imajen/RAFA.tl

DILI, RAFA.tl–Polísia Nasionál Timor-Leste (PNTL), Diresaun Servisu Investigasaun Kriminál (DSIK), sei aporezenta arguido na’in-neen husi estrutura reitoria Universidade Nasionál Timor Lorosa’e (UNTL) nian ba Ministériu Públiku hafoin termina investigasuan iha oras 72 nia laran.

Notísia Relevante: Polísia Halo Buska no Apreensaun Bá Reitór ho Dirijente Sira UNTL Nian

“PNTL liuhosi Diresaun Servisu Investigasaun Kriminál (DSIK), Kuarta (06/08/2025), implementa mandadu buska no apreensaun ne’ebé Tribunál fó hodi halo buska no apreensaun bá parte  dirijente sira UNTL nian. Buska no apreensaun ne’e, ami konsege dezenvolve ami-nia investigasaun, ami kolekta sasán sira ne’ebé mak ami buka hosi arguido na’in-neen,”  Portavóz  PNTL,  Superintendente Polísia João  Belo dos Reis, informa bá jornalista sira liuhosi konferensia imprensa iha sala enkontru Ministériu Interiór (MI), Kinta-ne’e.

Superintendente Polísia João  Belo dos Reis  hateten investigasaun la’o hela bá buska no apreensaun iha UNTL  nune’e órgaun Polisiál  sira iha tempu oras 72 nia laran  bá aprezenta Ministériu Públiku (MP).

Iha eskritóriu Reitór, Pro-Reitór ho direijente sira Payroll no Kontabilidade UNTL nian,  investigador sira prende dokumentu relativa ba kazu ne’e, aleinde buska ba iha arredór UNTL nian, ekipa kontinua kedas ba arguido sira nia rezidénsia, iha Kuarta-lorokraik,  hale’u  tuku 15:30 Otl.

Iha arguido sira-nia rezidénsia, Diresaun Servisu Investigasaun Kriminál (DSIK) ho ekipa bá   identifika karreta ho marka Ranger número matrikula A.16.2XX, motór rua marka Genio númeru matrikula  Y.16.XX TL, Beat N.44.XX TL, transporte hirak ne’e ekipa investigadór foti nia dokumentu.

Antes akipa halo identifikasaun ba rezidénsia  arguido sira-nian,  autoridade seguransa sira  aprezenta uluk mandadu buska no apreensaun husi Tribunál ba kazal ne’e aseita halo identifikasaun ba rezidensia no dokumentu relativa bá kazu.

Ekipa Reportajen RAFA