2026, Funsionáriu Públiku Tenke Servisu ho Responsabilidade

Primeiru-Ministru Kay Rala Xanana Gusmão, prezide serimónia hasa'e bandeira nasionál iha loron dahuluk servisu nian, fulan-Janeiru tinan 2026 iha Palásiu Governu, Segunda (05/01/2026). Imajen/Média G-PM

DILI, RAFA.tl – Primeiru-Ministru (PM), Kay Rala Xanana Gusmão, husu ba funsionáriu públiku sira iha ajente administrasaun Estadu hotu atu kontinua servisu ho responsabilidade hodi servi povu ho rai ne’e di’ak liután.

Xefe Governu hato’o deklarasaun ne’e ba funsionáriu públiku sira bainhira prezide serimónia hasa’e Bandeira Nasionál semana dahuluk fulan-Janeiru tinan 2026 iha Palásiu Governu, Segunda (05/01/2026).

Primeiru-Ministru Kay Rala Xanana Gusmão afirma tinan 2026 ne’e la’ós fásil, tanba ne’e buka kurize nafatin, atu povu fiar katak hetan tiha ukun-an, oan sira ne’ebé bá servisu hanoin netik sira nia moris, hanoin netik rai ne’ebé ema rihun atus ba atus fó tiha sira-nia vida la husu buat ida.

“2026, tinan mudansa, katak mudansa iha atitude, kompromisu no iha buat hotu-hotu, nune’e povu bele senti katak sira nia oan ne’ebé sai matenek, kaer servisu hanoin duni rai ida ne’e, la’ós hanoin de’it sira nia aan no família,” Primeiru-Ministru Kay Rala Xanana Gusmão hateten.

Xefe Governu afirma hafoin selebra festa Natal no tinan foun 2026, mak  hahú fali servisu prinsipál, nu’udár sarani no Timoroan ne’ebé hetan responsabilidade tenke hanoin saida mak halo tiha ona. Katak ida ne’e mak responsabilidade boot bá servisu na’in sira Estadu tomak iha tinan 2026.

Xanana Gusmão konsidera tinan 2026 importante teb-tebes tanba sempre temi bei-beik kona-bá halo korresaun ba administrasaun públika, tenke halo duni, no povu sei hadomi no respeita ajente administrasaun Estadu tomak bainhira hatudu servisu di’ak ba sira.

“Husu ba imi hotu, ba imi nia responsável sira administrasaun tomak, tenke servisu ho di’ak, responsabilidade ho hanoin ida, objetivu ida, servi rai no povu ida ne’e. Husu imi nia kompromisu. Fulan tolu mak laiha mudansa iha ita nia hahalok no iha servisu laran, entaun ita lalika iha tán serimónia hasa’e Bandeira Nasionál,” nia subliña.

Reportajen ekipa Rafa.tl