2025, ETO Fó Apoiu Finanseiru US$700,022.00 Ba FFTL

Membru Komité Independente FFTL períodu 2026-2030. Imajen/FFTL

Díli, 22 Outobru 2026  (RAFA)  –  Atu fasilita atividade no dezenvolve futebol iha Timor-Leste,   empreza grupu Esperança  Timor Oan  (ETO) liu husi programa Corporate Social Responsibility (CSR) iha  tinan 2025 apoiu Federasaun Futebol Timor-Leste (FFTL)  ho montante orsamentu  US$700,022.00.

Kontribuisaun ne’e lidera husi CEO ETO Group, Nilton Telmo Gusmão dos Santos, ho objetivu apoiu  atividade operasionál no administrativu FFTL atu organiza kompetisaun, partisipasaun ekipa nasionál iha kompetisaun internasionál no implementasaun programa dezenvolvimentu futebol iha rai-laran.

Tuir relatóriu anuál FFTL nian ba tinan 2025 kontempla katak apoiu husi ETO  ne’e mós kobre nesesidade ekipa nasionál mane no feto, inklui kategoria sénior no grupu idade oioin ne’ebé partisipa iha kompetisaun internasionál.

Aleinde ne’e, kontribuisaun ne’e mós inklui kustu alugu kampu iha rai-li’ur, apoiu ba kompetisaun Taça da Liga, pagamentu obrigasaun finanseira no sosa ekipamentu treinamentu ba ekipa selesaun nasionál.

Relatóriu finanseiru FFTL ba tinan 2025 ne’ebé aprezenta  durante Kongresu Extraordináriu FFTL ne’ebé hala’o iha Ótel Timor,  Díli,  iha loron 17 fulan-Outubru-ne’e, katak apoiu finanseiru husi ETO P atinji US$700,022.00.

Iha sorin seluk, fonte finansiamentu FFTL mós inklui apoiu husi instituisaun no parseiru sira seluk, hanesan FIFA, AFC, AFF, Governu Timor-Leste, Timor Telecom no fonte rendimentu seluk, ne’ebé kontribui ba kontinuidade atividade no dezenvolvimentu futebol iha Timor-Leste.

Kontribuisaun husi setór privadu, liuhusi parseria ho instituisaun desportiva, sai hanesan elementu importante ida atu hametin kapasidade organizasaun, hadi’a preparasaun ekipa nasionál, dezenvolve kapasidade atleta sira no aumenta oportunidade ba atleta Timoroan atu partisipa iha kompetisaun internasionál.

Apoiu finanseiru hanesan ne’e mós iha papel importante atu asegura kontinuidade programa sira, hadi’a infraestrutura no ekipamentu treinamentu, no promove dezenvolvimentu futebol ne’ebé sustentável iha Timor-Leste.

Ho kontribuisaun finanseiru US$700,022.00 husi empreza grupu ETO hatudu nia partisipasaun iha apoiu ba dezenvolvimentu desportu nasionál, liuliu futebol, liu husi programa responsabilidade sosial korporativa no parseria ho FFTL.

Jornalista: Marito da Costa