2025, Autoridade Aduaneira Kolleta Reseita US$120,850,308.46

Komisáriu Autoridade Aduaneira (AA), Joanico Pinto. Imajen/Rafa.tl

DILI, RAFA.tl–Ministériu Finansas (MF), liu husi Autoridade Aduaneira (AA) iha períodu 2025 hahú husi fulan-Janeiru to’o fulan-Dezembru tinan 2025 kolleta reseita hamutuk US$120,850,308.46. 

Husi totál reseita US$120,850,308.46 ne’e,  Autoridade Aduaneira kolleta husi fatin instalasaun hitu (7)  maka hanesan;

• Postu Integradu Fronteira Batugade husi fulan-Janeiru to’o fulan-Dezembru tinan 2025 kolleta US$2,543,941.43
• Atividade Petróleu ne’ebé hanaran Bayu Undang offshore, mézmu ida ne’e desmantela ona, maibé nia atividade sira kontinua kontribui ba reseita iha tinan 2025 hamutuk US$37,111.10
• Aeroportu Internasionál Prezidente Nicolau Lobato, Comoro, kontribui reseita hamutuk US$1,479,796.98
• Portu Baia Tibar-Liquiça kontribui totál reseita US$116,201,445.71
• Postu Integrado Fronteira Maliana-Tunubibi hamutuk US$11,512.18
• Edifísiu de Korreius kontribui reseita hamutuk US$12,642.54
• Postu integradu fronteira Salele hamutuk US$ 563,858.52.

Komisáriu Autoridade Aduaneira (AA), Joanico Pinto, ba jornalista sira iha Ministériu Finansas, Díli, Segunda (12/01/2026) hatete, husi reseita ne’ebé kontribui, Autoridade Aduaneira konsege ultrapassa alvu ne’ebé maka governu liu husi Ministériu Finansa halo supervizaun ho alvu ne’ebé sei kobre de’it millaun US$109, maibé realidade ultrapassa.

“Iha tinan kotuk (2024)  governu liu husi Ministériu Finansas halo previzaun ba ami ho alvu atu atinji millaun US$109 iha tinan 2025, entaun ami nia kolleksaun to’o millaun US$120 resin, ne’e signifika ami ultrapassa tiha alvu ne’ebé maka ministériu  fó mai ami iha tinan 2025,” Komisáriu Aduaneira Joanico Pinto hateten.

Komisáriu ne’e hatutan, husi reseita ne’ebé maka Autoridade Aduaneira kontribui, aplika tipu impostu tolu ne’ebé aplika ba Customs importasaun, ba impostu de venda no ba iha impostu seletivu konsumu.

Nia esplika, bainhira empreza ka individu sira hola viatura sira ne’e tenke minimal  nia prazu tinan-lima (5 anos) no nia kondisaun tenke di’ak, maibé balu mai vidru nakfera sira ne’e hotu, Autoridade Aduaneira sujeitu ba investigasaun depois aplika penalidade ba sira selu kontribuisaun sira.

“Reseita sira ne’e la’ós de’it mai husi ita nia kontribuisaun servisu tama mai ne’e, maibé mós ho esforsu sira seluk ne’ebé ita prende nia penalidade koima sira ne’e hotu,” Nia informa.

Komisáriu Autoridade Aduaneira ne’e subliña  sira-nia parte nafatin servisu ho transparénsia no tuir lei hodi garante reseita ba Estadu Timor-Leste no bele kontribui ba kresimentu ekonómia país nian.

Reportajen ekipa Rafa.tl