19-20 Agostu 2025, Timor-Leste ho Indonézia Hahú Negosiasaun Fronteira Marítima iha Dili

PM Xanana Gusmão hasoru malu ho Prezidente Indonézia, Prabowo Subianto iha Jakarta, foin lalaios ne'e. Imajen/Dok. Gabineten Média-PM

DILI, RAFA.tl—Timor-Leste ho Repúblika Indonézia marka ona orariu atu hahú negosiasaun fronteira marítima entre rai rua ne’ebé sei hala’o iha Dili, iha loron 19 to’o loron 20 fulan-Agostu ne’e.

 Komunikadau imprensa ne’ebé Rafa.tl asesu husi Gabinete Média Primeiru-Munistu, Segunda (18/08/2025), relata katak ofisiál seniór sira husi Timor-Leste ho Indonézia sei involve iha diskusaun estruturadu ho objetivu atu delimita fronteira marítima permanente ida entre nasaun rua.

Negosiasaun marítima formál akontese hafoin tinan lubuk ida husi diálogu informál, enkontru esploratóriu no troka informasaun téknika sira entre estadu rai rua ne’ebé parte sira kontinua komprometidu bá rezolusaun pasífika bá niafFronteira farítima sira tuir Lei Internasionál no Konvensaun Nasoins Unidas kona-bá Direitu Tasi nian (UNCLOS, sigla Inglés).

Ronda negosiasaun fronteira marítima ne’ebé sei mai subliña dedikasaun kompartida hu Timor-Leste ho Indonézia, atu mantein estabilidade rejionál, kaer metin Lei Internasionál no haburas relasaun viziñu ne’ebé di’ak.

Timor-Leste fahe fronteira marítima ho Austrália no Austrália asina akordu ida iha Nasoins Unidas iha Nova Iorke ne’ebé halo delimitasaun bá sira-nia fronteira marítima ho Timor-Leste iha fulan-Marsu 2018.  Akordu ne’e hetan liuhosi prosesu konsiliasaun obrigatóriu UNCLOS nian.

Negosia Fronteira Marítima ho susesu ho Indonézia sei permite Timor-Leste atu kompleta nia soberania marítima no direitu soberania, ne’ebé importante tebes bá governasaun efetiva, konservasaun tasi, jestaun rekursu no seguransa nasionál Timor-Leste nian.

Ekipa reportajen Rafa.tl