Tinan-Haat Ona Projetu Monumentu Memoriál Masakre Santa Kruz Seidauk Finaliza

Prezidente C12N, Filipe Rodrigues Perreira. Imajen/Rafa.tl

DILI, RAFA.tl—Tinan-haat (4) ona projetu konstrusaun monumentu memorial masakre Santa Kruz 1991 seidauk finaliza ka kontinua la’o hela  (on going).

Projetu monumentu memoriál Santa Kruz, 12 Novembru 1991 ne’e ho  nia kustu millaun $1.385,   ne’ebé empreza nasionál Bobolait, Lda hahú ezekuta iha tinan 2021 ho primeiru kontratu durasaun tinan ida, hahú hosi loron 22 fulan-Setembru tinan 2021 to’o loron 22 fulan-Setembru tinan 2022 no períodu kontratu ne’e rasik termina ona no kontinua halo estensaun ba dala-ua’in ona.

Komité 12 Novembru (C12N)  nu’udár grupu ne’ebé reprezenta sobrevivente sira no família vítima sira husi Masakre Santa Kruz, 12 Novembru 1991, husu Governu atu aselera projetu monumentu momoriál masakre Santa Kruz ne’ebé tinan barak ona seidauk konklui.

“Ha’u husu bá Governu liuliu Primeiru-Ministru Kay Rala Xanana Gusmão atu bele kanaliza liuhosi Ministériu Asuntu Kombatente no Libertasaun Nasionál (MACLN, sigla portugés) aselera konstrusaun monumentu  momoriál Masakre Santa Kruz, 12 Novembru 1991 ne’e,” Prezidente C12N, Filipe Rodrigues Perreira, informa bá Jornalista sira iha Santa Kruz, Dili iha ámbitu komemorasaun tinan-34 Masakre Santa Kruz, Kuarta (12/11/2025).

“Ohin, ita ko’alia ho Primeiru-Ministru maun-boot Xanana Gusmão atu tau atensaun mós  no bele ko’alia  ho Ministru MACLN  Gil Monteiro Oan Soru bele aselera produsaun monumentu 12 Novembru ne’e,” Filipe Rodrigues Perreira  haktuir.

Filipe Rodrigues Perreira  informa tanba hakarak monumentu ne’e kualidade maka C12N ko’alia ho VIII Governu hodi tau tan osan $300,000.00 itál.

“Ami lakohi monumentu ne’e laiha kualidade, entaun iha IX Governu nian sira foti amostra husi estatua Amu Papa João Paulo II entaun MACLN halo diskusaun ho C12N no hakarak halo kualidade ne’ebé hanesan mós ho estatua Amu Papa João Paulo II nian,” Filipe Rodriques Pereira hateten.

Tuir  koñesimentu prezidente C12N nian ne’e katak  projetu ne’e foin atinje 50%,  presiza atinje tán 50% nune’e  fatin bá konvidadu sira tuur ne’e  apoiu husi embaixada  Uniaun Europeia mak harii.

Fó hanoin fali katak konstrusaun projetu monumentu memoriál Masakre Santa Kruz, 12 Novembru 1991, hala’o husi empreza Bobolait, Lda dezde tinan 2021 ho primeiru kontratu ho durasaun tinan ida, hahú husi loron 22 fulan-Setembru tinan 2021 to’o loron 22 fulan-Setembru tinan 2022.

Períodu kontratu ne’e rasik termina ona iha tinan 2022, maibé depois projetu na’in, Ministeriu Asuntu Kombatente ba Libertasaun Nasionál (MACLN, sigla portugés) ho empreza kontraktor Bobolait, Lda, deside  extende tan ba fulan-neen (6) no període fulan-neen ne’e rasik  termina tan ona no obra refere nunka konklui to’o deit tinan 2025.

Reportajen Ekipa Rafa.tl