Timoroan Kontínua Hetan Grasa ho Prezensa Krús Joven Internasionál

Krús Joven Internasionál to'o iha Timor-Leste. Imajen/Rafa.tl

DILI, RAFA.tl- Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, hateten timoroan tomak kontínua hetan grasa no bensan ho prezensa Krús Joven Internasionál ne’ebé  vizita Timor-Leste durante loron ualu (8).

Notísia Relevante: Sarani no Kreda Timor ho Entuziazmu Simu Krús Joven Internasionál

Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, hato’o lia hirak ne’e bá sarani no peregrinu sira ne’ebé akompaña Krús Joven Internasionál too iha Igreja Katedrál Parokia Imaculada Conceição, Dili, Ssábadu (23/08/2025).

“Tinan ida-ne’e nia laran, ita kontínua hetan grasa oin-oin, sulin mai ita-nia rai, ne’e-duni, nu’udár timoroan, nu’udár sarani igreja Timor nian no ita timor-oan, ita sente kontente tanba maske rai ki’ikuan, nasaun ki’ikuan, maibe iha Maromak nia oin, ita la’ós ki’ikuan. Depois de vizita sua santidade Papa Francisco nian iha tinan kotuk (09-11 Setembru 2024), tinan ida ne’e, ita iha illas Krús Joven Internasionál, ida ne’e sinal rekoñesimentu ne’ebé estraordináriu,  no nu’udár momentu grasa nian,” Dom Virgílio Kardeál do Carmo da Silva, SDB hateten.

Arsebispu ne’e hatutan, ho prezensa Krús Joven Internasionál iha Timor-Leste, atu fó korajen ba foin-sa’e sira, atu banati tuir ezemplu Kristu nian, hodi serbí ema seluk ho domin no nakonu ho karidade no sakrifísiu.

“La’os atu agradese, maibé momentu ida, atu ita mós aproveita oportunidade grasa ida ne’e, atu Nai Nia bensaun hela iha ita idak-idak no ita-nia rain, liu-liu mai rai Timor ne’ebé nakonu ho labarik no foin-sa’e sira ne’e, bele hatene lolos sira nia knaar no dever nu’udár sarani diak, hodi serbí uma kreda no nasaun ho domin, no iha korajen atu haree bá Krús, la’o tuir Krús no banati tuir ezemplu murak be Kristu husik hela iha Krús, hanesan foin-sa’e Katóliku ida,” Dom Virgílio Kardeál do Carmo da Silva tenik.

Lee Mós: Krús Joven Internasionál Vizita Kreda Timor Durante Loron-ualu

Dom Virgílio mós husu ba sarani sira, iha opirtunidade ida-ne’e, sarani sira tenke reza, atu ho prejensa Krús Joven Internasionál no Nai Feto Maria salus Populi, iha momentu ida-ne’e bele halibur timoroan hotu, hametin liu tan hotu-hotu nia fiar, unidade, paz iha rai doben Timor-Leste.

Líder Igreja Katóliku ne’e, husu mós bá sarani sira husi Dioseze Baucau, atu labele lakon oportunidade ida ne’e, maske Krús la to’o iha Dioseze Baucau, maibe iha momentu furak ne’e, buka atu reflete ksolok ida-ne’e, tanba ne’e ba hirak ne’ebé iha oportunidade aban bele mai tuir missa, iha Parókia Imaculada Consenção, tanba Illas ne’ebé sama iha rai Timor ne’e lori grasa no sarani tomak, inklui sarani Dioseze Baucau.

Kardeál mós aproveita oportunidade hodi hato’o agradesimentu ba parte hotu nia kontribuisaun, liu-liu ba parte sivíl no militár nian, bá sarani no peregrinu sira ne’ebé ho fiar metin simu illas Krús Joven Internasionál iha Timor-Leste.

Reportajen Ekipa Rafa.tl