Taça da Liga, Assalam F.C Garante Halakon Nagardjo F.C Hodi Hadau Oportunidade Ba Faze Meia-finál

Ekipa Assalam F.C iha Taça da Liga 2025. Imajen/Rafa.tl

DILI, RAFA.tl– Ekipa Assalam F.C garante manán nia adversáriu Nagardjo F.C iha jogu ikus grupu B nian hodi hadau tabela klasifikasaun no hakat ba faze meia-finál iha Taça da Liga 2025.

Notísia Relevante: DIT F.C Eliminadu Husi Taça da Liga Hafoin Lakon ho Nagardjo F.C ho Skor 2-1

Treinadór Assalam F.C, Adu Marques Nami Ruru, iha  konferénsia imprensa ne’ebé hala’o iha Estádiu Munisipál Díli, Kuarta (28/01/2026), afirma jogu entre Assalam F.C ho Nagardjo F.C hanesan jogu determinasaun  ba ekipa rua hodi hakat ba faze tuir mai,  Tanba ne’e, ekipa Assalam F.C halo esforsu hodi rekolla tan pontu tolu bele hakat ba faze tuir mai.

“Ami nia preparasaun másimu no atu hasoru Nagarjo, maske ami agora ne’e pontu hanesan nia bola mós ami hetan plus (+) hanesan, maibé ha’u garantia ha’u nia jogadór sira sei manán tres pontu hasoru Nagardjo,” Adu Marques Nami Ruru hateten.

Kapitaun ekipa Assalam F.C, Batista Josman K. Olan afirma sira-nia ekipa preparadu hodi  kompete no rekolla pontu tolu hasoru adversariu iha jogu ikus grupu B nian.

“Ami prontu, Nagardjo mós segundu divizaun, maibé nia ema sira mesak primeiru divizaun deit, ba ami Asalam prontu atu hasoru no ami hakarak rekolla pontu tolu no ami hakarak hakuur ba meia-finál,” Batista Josman K. Olan afirma.

Treinadór Nagardjo F.C, Eduardo Perreira, konfirma nia parte observa ona Assalam F.C nia jogu, nune’e sei kolabora ho jogadór sira atu hamate jogu Asalam nian no iha esperansa  halakon Assalam F.C.

Nia hatutan Nagardjo F.C iha jogu hasoru DIT F.C konsege rekolla pontu tolu no ida-ne’e hanesan motivasaun ida ba jogadór sira para iha espíritu ba jogu tuir mai hasoru Assalam  ho ritmu aas liután.

“Ha’u nia ekipa preparadu para atu ba jogu iha Sábadu (31/01/2026). Iha minutu 90 mak sei determina katak manan ka lakon, tanba Assalam F.C mós prepara di’ak,” Eduardo Perreira hateten.

Ekipa Assalam F.C no Nagarjo F.C sei joga kontra malu iha loron 31 fulan-Janeiru ne’e, no jogu ne’e hanesan jogu ikus no determina atu se mak sei hakat ba faze meia-finál iha Taça da Liga 2025.

Reportajen ekipa Rafa.tl