Taça da Liga, As Marca Susesu Halakon Santa Cruz F.C ho Skor Mihis 1-0

Ekipa As Marca. Imajen/Rafa.tl

DILI, RAFA.tl – Klubu Estimadu Komunidade Delta IV, As Marca ho susesu rekolla pontu tolu hafoin halakon nia adversáriu Santa Cruz F.C ho skor mihis 1-0, iha jogu kontinuasaun Taça da Liga FFTL, grupu D.

Notísia Relevante: F.C Porto Taibessi Lidera Tabela Klasifikasaun Grupu C Hafoin Manán Lica-Lica Lemorai F.C ho Skor 3-0

Jogu Taça da Liga FFTL ne’ebé hala’o iha Estádiu Munisipál Díli, Domingu (01/02/2026), ekipa As Marca no Santa Cruz F.C halo jogu ida di’ak no anima tebes adeptu sira ne’ebé ba diretamente Estádiu hodi asiste.

Ekipa rua iha oportunidade hanesan iha minutu dahuluk jogu hahú. Treinadór husi ekipa rua fó instrusaun ba jogadór sira atu foku ba jogu no halo pasajen bola ida akuradu no mantein disiplina.

Tama ba minutu 40, jogadór As Marca, Carol Vio, marka golu ida hodi muda skor iha tabela ba 1-0. Ekipa rua mantein halo jogu tuir ida-idak nia ritmu, maibé laiha tan golu ruma akontese to’o primeira parte termina.

Tama ba segunda parte, Santa Cruz F.C hahú halo mudansa ba tátika, nune’e hahú halo tranzisaun ba liña klaran hodi buka domina jogu no soe bola ba oin hodi avansadu sira halo presaun ba adversáriu. Maibé ekipa As Marca mantein ho koordenasaun ne’ebé iha mantein sólidu hodi asegura ameasa sira husi adversáriu.

As Marca hasa’e liutan intensidade jogu ho intensaun atu haboot skor, maibé oportunidade barak ne’ebé iha la maximiza husi jogadór sira hodi aumenta golu.

Santa Cruz F.C halo mós substituisaun ba jogadór sira, maibé falla halo mudansa, nune’e to’o jogu termina vitória ba As Marca.

Treinadór Santa Cruz F.C, Miguel Santos Soares konsidera Taça da liga ne’e sai hanesan sasukat ba sira hodi prepara aan ba primeira divizaun époka ne’e.

“Loron hirak liubá ha’u dehan, ami mai husi segunda divizaun, promovidu ba primeira divizaun, ami mai atu sai sasukat ba primeira divizaun, ita hatene katak As Marca iha nia level ne’ebé mak iha primeira divizaun, nia top five, ekipa ne’ebé maka’as, maibé ohin ami ho esforsu no ha’u fó parabéns ba ha’u nia jogadór sira, sira esforsu aan ho di’ak,” Miguel Santos Soares hateten.

Iha fatin hanesan, Treinadór As Marca, Francisco Araújo,  louva ekipa Santa Cruz F.C nia performa, tanba nia ekipa manán de’it ho skor 1 – 0 maske ekipa referida foin atu promove aan.

“Ita hatene katak Santa Cruz ekipa ne’ebé mak foin promove husi segunda divizaun, maibé ami mos mai la’os katak,  ami mak di’ak liu lae, ami respeita nafatin Santa Cruz, ekipa ne’ebé mak forte, ne’ebé mak promove husi segunda divizaun, entaun ita haré katak, ohin Santa Cruz mós fó presaun maka’as ba ami, ami manán ho skor ne’ebé mak mihis tebes,” Francisco Araújo hateten.

Maske manán iha jogu kontra Santa Cruz F.C, la garante ekipa As Marca atu hakat ba faze meia-finál Taça da Liga FFTL époka ne’e, tanba antes ne’e derota ona ho klubu Karketu Díli F.C.

Tuir oráriu, jogu Taça da liga iha grupu D, Santa Cruz F.C, sei joga hasoru Karketu Díli F.C iha jogu ikus ne’ebé sei hala’o iha  Domingu, 08 fulan-Fevereiru 2026, iha Estádiu Munisipál Díli.

Reportajen Ekipa Rafa.tl