Sistema ATCS Deteta Transporte 32 Kontra Sinais Tránzitu no Sei Aplika Koima Bainhira Trata Dokumentu

Sistema Area Traffic Control System (ATCS) deteta transporte públiku no privadu hamutuk 32 kontra sinais tránzitu. Imajen/Rafa.tl

DILI, RAFA.tl– Diretora Diresaun Nasionál Transporte Terrestre (DNTT), Maria Antónia hateten, ekipa operadór ne’ebé halo monitorizasaun liuhosi Sistema Area Traffic Control System (ATCS) deteta transporte públiku no privadu hamutuk 32 kontra sinais tránzitu.

Notísia Relevante: Selebra Loron Finadu, DNTT ho PNTL Husu Motorista sira Labele Tula Pasajeiru Liu Kapasidade Karreta Nian

Diretora Diresaun Nasionál Transporte Terrestre (DNTT), Maria Antónia haktuir, monitorizasaun ba ATCS, Diresaun Nasionál Transporte no Terrestre  (DNTT) hahú halo husi loron 20-28 fulan-Outubru ne’e,  no iha semana ida nia laran de’it, deteta ona motorista sira hahú halo infrasaun, liu-liu kontra sinais tránzitu sira.

“Ita monitoriza sirkulasaun rodoviáriu ne’e, no ita-nia motorista balun maka halo infransaun iha ne’ebá, ita blokea nia dadus, ita hatene ona, se iha númeru telefone ami kontaktu liu husi telefone. Bainhira sidadaun ne’ebé mak halo infrasaun nia mai trata nia dokumentu nia dadus blokeadu. Entaun tenke selu infrasaun nia komete hafoin ita liberta fali,  maka nia halo prosesu fali ba nia dokumentu,” Maria Antónia informa ba jornalista sira iha edifisiu DNTT Balide, Dili, Kuarta (29/10/2025).

Diretora  DNTT ne’e afirma, Diresaun Nasionál Transporte  no Terrestre  prepara invoice banku nian hodi aplika koima ba motorista sira, ne’ebé komete infrasaun kontra sinais tránzitu.

“Ami iha dadus ne’ebé mak loron-loron ita aponta ba transporte sira ne’e, agora ita konfirmadu ona ba motorista sira no sira sei selu koima ba estadu tuir infrasaun ne’ebé sira komete,” Nia esplika.

Iha parte seluk, Xefe Departamentu Koordenasaun Jestaun Risku ba Formasaun no Edukasaun Sívika, Superintendente Assistente Polísia, Domingos Sarmento Gama hatete, ho Sistema Area Traffic Control System  (ATCS), atu fó hanoin ba motorista sira, atu prevene asidente sira. Bainhira  obriga hakarak komete infrasaun, sistema sei akapta sira nia transporte sira, nune’e bainhira ba trata sira nia dokumentus iha Diresaun Nasionál Transporte Terrestre sei aplika koima tuir infrasaun ne’ebé sira komete.

Reportajen ekipa Rafa.tl