Sarani no Kreda Timor ho Entuziazmu Simu Krús Joven Internasionál

Sarani no Kreda Timor ho entuziazmu simu Krús Joven Internasionál iha Aeroportu Internasionál Prezidente Nicolau Lobato, Dili, Sábadu (23/08/2025). Imajen/Rafa.tl

DILI, RAFA.tl– Sarani Katólika Timor-Leste ho entuziazmu simu Krús Joven Internasionál ne’ebé vizita Kreda Timor, Sábadu (23/08/2025).

Notísia Relevante: Ema Na’in-12 Sei Lori Krús Joven Internasionál husi Aeroportu to’o Igreja Katedrál Dili

Sarani Katólika Timor-oan, liuliu joventude katólika feto no mane, ho entuziazmu simu Krús Joven Internasionál iha Aeroportu Internasionál Prezidente Nicolau Lobato, Dili, iha tuku 13:00 Otl, bainhira to’o iha Timor ho aviaun komersiál Aero Dili.

Krús Joven Internasionál mai vizita Kreda Timor  akompaña ho delegasaun husi Koreia-Súl na’in-haat (4), ne’ebé kompostu husi Padre Misionáriu Koreanu nain-ida (1), média ka jornalista ida(1) no delegadu na’in-rua (2).

Hafoin Krús Joven Internasionál ne’e to’o iha Aeroportu Internasionál Prezidente Nicolau Lobato, ekipa tékniku husi  Salesianu na’in-haat (4) mak monta,  hamutuk ho komisaun sira ne’ebé responsavel akompaña mós iha sala VIP, husi Sua Eminénsia Dom Virgílio Kardeál do Carmo da Silva, SDB, presidente Ezekutivu KomisaunNnasionál Juventude Katólika Timor-Leste (CNJTL) Pe. Francisco Indra do Nascimento Tey-Seran, inklui mós ho protokolu sira ne’ebé kompostu husi igreija no estadu nian husi Ministériu Negósiu Estranjeiru no Kooperasaun (MNEK).

Hafoin ekipa halo montajen ba krús remata,  kontínua ho tara tais, aprezentasaun dansa kultura husi Sarani Vigararia Viqueque, inklui saran lia dadolin.

Krús Joven Internasionál nia vizita ba dala-uluk antes ne’e iha tinan 2008  husi Austrália mai hela iha Timor durante loron tolu,  no tinan ida ne’e vizita ba dala-rua iha Kreda Timor durante loron ualu nia laran, hahú husi loron 23 to’o loron 30 fulan-Agostu 2025. Krús Joven Internasionál, ne’e inisia husi Papa João Paulo II, nu’udár sinál dame no esperansa nia.

Reprezentante sarani, Isabel de Fátima, kontente no orgullu tanba Krús Santu  ne’e bele mai vizita hikas Kreda Timor no Timor-oan sira.

“Ami nu’udar inan-aman sarani kontente tanba Krús  Joven Internasionál mai vizita rai Timor-Leste atu sai mahan nafatin bá rai Timo,r liu-liu ba oan doben juventude sira kaer metin nafatin sira, fó fiar nafatin ba sira hodi lao ba oin nafatin,” Isabel de Fátima hateten.

Isabel de Fatima, fiar katak Krús Santu ne’ebé sei hela iha Timor durante loron-ualu (8) nia laran sei lori sinal domin no salvasaun, no bensaun ne’ebé la nahas ba rai Timor.

Hafoin remata serimonia iha Aeroportu Nicolau Lobato, sarani Katólika Timor-oan sira halo prosesaun lori  Krús Joven Internasionál ho Maria Salus Populi, mai iha Igreja Katedral Parókia Imaculada Conceição, akompaña  husi Polísia Nasional Timor-Leste (PNTL), liu husi Unidade Tranzitu, reprezentante husi parte governu, Akolitu sira, inklui peregrinu sira.

To’o iha Katedrál Díli, kontinua kedas dansa kultura, hodi akompaña Krús Joven Internasionál no Maria Salus Populi.

Tuir orariu ne’ebé maka iha, kontinua ho venerasaun ba  Krús no Domingu  aban  sei iha selebrasaun missa iha tuku 07:00 dadeer  iha Igreja Katedrál Dili.

Istória Krús Joven Mundiál

Istória Krús Internasionál ka Krús Juventude Mundiál (OMK) hahú iha tinan 1984 bainhira Amu-Papa João Paulo II entrega ba joven sira atu lori hale’u mundu nu’uáar preparasaun ba Loron Mundiál Juventude dahuluk. Nune’e, deside krús sai hanesan símbolu ida fiar nian, esperansa nian, no unidade nian ba joven Katóliku sira iha mundu tomak, ne’ebé hahú viajen espirituál sira no sai pontu fokál ida ba selebrasaun Loron Munidál Juventude.

Orijen no Entrega Krús nian

Iha tinan 1984, Amu-Papa João Paulo II entrega krús ai ida ba foin-sa’e sira mundu nian iha Roma ho intensaun atu enkoraja foin-sa’e sira atu lori krús iha mundu tomak, hodi halo ida-ne’e sai meiu ida ba evanjelizasaun no preparasaun espirituál ba Loron Munidál Juventude

Viajen Loron Mundiál Juventude dahuluk akontese iha Roma iha tinan 1985, hodi marka inísiu tradisaun Krús iha Loron Mundiál Juventude sira nian ho nia símbolu no foku sai nu’udár pontu fokál ba selebrasaun Loron Mundiál Juventude nian hotu, ne’ebé hala’o kada tinan rua.

Viajen Krús nian

Krús la’ós de’it prezente iha eventu boot sira Loron Mundiál Juventude  nian, maibé mós halo viajen ba dioseze no parókia oioin iha mundu tomak, hodi permite foin-sa’e sira atu halo interasaun, reza, no reflete kona-bá sira-nia fiar hamutuk. Nune’e, durante  Krús Joven Internasionál  vizita ba rejiaun ida, sai hanesan foku ba atividade sira hanesan sesaun venerasaun, katekeze, adorasaun, sakramentu rekonsiliasaun (konfisaun), no misa enserramentu.

Viajen Krús Joven Internsionál ne’e simboliza viajen espirituál ne’ebé halibur foin-sa’e sira husi nasaun oioin iha orasaun no preparasaun espirituál.

Krús reprezenta fiar, esperansa, no unidade hosi joven Katóliku sira iha mundu tomak, eransa espirituál ida ne’ebé kontinua hetan onra hosi Amu-Papa.

Notísia Relevante: Krús Joven Internasionál Vizita Kreda Timor Durante Loron-ualu

Reportajen Ekipa Rafa.tl