S’amuser F.C Kampiaun LTFF Hafoin Empate Kontra A.D S.L.B Laulara ho Skor 0-0

S’amuser F.C kampiaun Liga Timorense Futeból Femenino (LTFF) époka 2025/2026 hafoin empate ho A.D S.L.B Laulara ho skor 0-0. Imajen/FFTL

DÍLI, RAFA.tl – Ekipa S’amuser F.C kampiaun Liga Timorense Futeból Femenino (LTFF), époka 2025/2026 hafoin iha jogu ikus empate ho ekipa A.D S.L.B Laulara ho skor 0-0.

Notísia Relevante:  Domingu Finál Jogu LTFF, A.D S.L.B Laulara ho S’amuser F.C Preparadu Hadau Títulu Kampiaun

Ekipa S’amuser F.C ne’ebé kampiaun LTFF rekolla pontu 45 husi jogu 18 iha ne’ebé ekipa ne’e manan 14, empate rua (2) no lakon dala-ida (1).

Ekipa A.D S.L.B Laulara rekolla deit pontu 43 husi jogu 18 tanba manan 13, empate tolu (3) no lakon dala-ida (1).

Iha jogu finál LTFF iha kampu Federasaun Futeból Timor-Leste (FFTL), Domingu (22/03/2026), ekipa S’amuser F.C no A.D S.L.B Laulara hatudu jogu ida atrativa no anima tebes adeptu sira ne’ebé ba asiste direita ekipa rua nia jogu.

Durante jogu ekipa rua hatudu jogu ida nakonu ho disiplina hodi la komete erru sira hodi fó oportunidade ba adversáriu. Jogadora sira halo pasajen bola no aplika tátika tuir instrusaun husi treinadór sira.

Ekipa A.D S.L.B Laulara konsege lansa atake ba S’amuser F.C no halo presaun barak, maibé jogadora sira S’amuser F.C mantein kalma no ho disiplina.

Durante primeira parte no segunda parte iha minutu 90 nia laran ekipa rua mantein ho skor 0-0 no ho rezultadu ne’e halo ekipa S’amuser F.C ne’ebé lidera tabela klasifikasaun sai kampiaun ba Liga Futeból Femenino époka ne’e.

Sekretariu Jerál A.D S.L.B Laulara, Domingos Caeiro, ba jornalista sira hateten maske lahetan sorte durante jogu, maibé nafatin agredese ba esforsu tomak ne’ebé  ekipa halo ona no parabéns ba esforsu tomak ne’ebé ekipa S’amuser halo to’o kampiaun iha jogu ne’e.

“Fó parabéns ba Jogadora A.D S.L.B tanba hatudu jogu desesivu duni, jogu determinante ida ne’ebé mak atu sai kampiaun. Bele hatete katak jogu iha minutu 90 aumenta tan extra A.D S.L.B domina, maibeé sorte mak laiha, iha futeból nia lalaok mak hanesan ne’e, sira hatudu jogu ida ohin ne’e diferente tebes ho jogu uluk, se durante sira halo jogu hanesan ne’e, ha’u hanoin kampiaun antes ona. Ami mós hakarak fó parabéns ba S’amuser,” Domingos Caeiro.

Iha Fatin hanesan kapitaun Ekipa S’amuser F.C, Godelidia Martins, hateten kampiaun ne’ebé sira hetan lases husi adeptu no família boot S’amuser nia apoiu no promete  kontinua halo treinamentu maka’ás, atu nune’e, bele enfrenta ho di’ak  liga sira tuir  mai.

“Obrigada ba ha’u nia adeptu sira ne’ebé mak suporta ona ami, ba famîlia husi S’amuser, ba ha’u nia família, ba kolega sira ne’ebé mak apoiu ona ami, no ohin ami kontente tebes tanba sira-nia suporta mak ohin ami iha forsa iha jogu ne’e,” Godelidia Martins hateten.

Jogadora ne’e hatutan, ekipa S’amuser F.C iha jogadora ho idade under sub-17 to’o sub-23 tanba ne’e sira sei kontinua akompaña no fó motivasaun ba jogadora foin-sa’e sira hodi nafatin treinu no disiplina atu kontribui ba futeból Femenino iha Timor-Leste.

Ekipa S’amuser F.C ne’ebé kampiaun LTFF hetan medalla husi FFTL inklui ho Prémiu kampiaun osan US$15.000,00.

Reportajen ekipa Rafa.tl