Rogério Lobato Husik Hela Oé-Cusse, “Ami Sei Prepara Relatóriu Tranzisaun Ida Pasífiku no Tuir Lei”

Prezidente Autoridade sesante Rejiaun Administrativa Espesiál Oé-Cusse Ambeno (RAEOA), Rogério Tiago de Fátima Lobato ho Prezidente Autoridade RAEOA foun, Régio da Cruz Salu koalia ba jornalista sira hafin hasoru malu iha edifísiu RAEOA, Sesta (29/08/2025). Imajen/Rafa.tl

OÉ-CUSSE, RAFA.tl– Prezidente Autoridade sesante Rejiaun Administrativa Espesiál Oé-Cusse Ambeno (RAEOA), Rogério Tiago de Fátima Lobato, Sesta (29/08/2025), husik hela  ona atóni-oan sira  iha rai enklave Oé-Cusse hodi fila mai Dili atu prepara relatóriu tranzisaun ida ne’ebé pasífiku no tuir lei.

Notísia Relevante: Governu Nomeia Regio da Cruz Salu Bá Prezidente Autoridade RAEOA ho Mandatu Fulan-tolu

Iha ámbitu serimónia despedida ne’e, Rogério Tiago de Fátima Lobato, halo mós  enkontru ofisiál ho Prezidente Autoridade RAEOA foun, Régio da Cruz Salu ho Koordenadór bá implementasaun Zona Dezenvolvimentu Ekonómiku Espesiál Oé-Cusse Ambeno (ZEEDOA), Herculano Sousa iha edifísiu Autoridade RAEOA.

Rogério Tiago de Fátima Lobato bá jornalista sira hateten, sorumutuk ne’e hanesan enkontru ida normál iha profisionalismu públiku nian, oinsá bele halo tranzisaun ida ne’ebé di’ak, ho profisionalismu no responsabilidade bá Prezidente Autoridade foun.

Rogério Lobato hateten Prezidente Autoridade foun la’os ema seluk, ema ida ne’ebé servisu hamutuk keur ona, iha esperiénsia no matenek.

“Bá dala-uluk ha’u hakarak fó ha’u nia parabéns bá Prezidente Autoridade foun, ho Koordenadór ZEEDOA no estrutura tomak, bá responsabilidade ne’ebé sira simu,” Rogério Lobato hateten.

Nia hato’o lia menon balun ba sira, oinsa mak bele servisu di’ak, hakuak ema hotu, labele haree bá koore, hakuak ema hotu hanesan Timoroan.

“Importante mak tenke lao nafatin bá oin, no ha’u sai husi Oé-Cusse ho orgullu tamba iha tempu badak, konsege servisu hamutuk no halo buat barak iha Oé-Cusse, maibé desizaun husi Primeiru-Ministru no Konsellu Ministru mak ida-ne’e,  ha’u simu ho di’ak tamba iha administrasaun estadu, ita simu knaar no ita mós bele husik knaar,” Rogério Tiago Lobato.

“Sira ne’e mak jerasaun foun, ami sira ne’ebé hahú prosesu ne’e bá ukun rasik aan, ami sei moris, sira komesa simu ona knaar, kuandu ami haree katak buat ruma la’o laloos, ami bele fó hanoin bá sira para atu hadi’a. Importante mak hamutuk para serbí rai ne’e.”

Estrutura Prezidente Autoridade RAEOA sesante sei prepara relatóriu, tanba desizaun ne’e sai lalais deit, tanba ne’e horseik halo ona enkontru ho Sekretáriu Rejionál sira para atu prepara relatóriu para entrega iha serimonia entrega (hand over)  tanba  tuir lei, labele halai husi responsabilidade, tenke hato’o ba Autoridade foun saida mak halo no saida mak estrutura foun bele halo bá oin.

“Labele hanesan ami simu iha 2024, ami la simu buat ida, ami tenke lamas tun-sae hodi buka solusaun,” Rogério Lobato tenik.

Iha fatin hanesan, Prezidente Autoridade RAEOA foun, Régio da Cruz Salu hateten, iha reuniaun ne’e atu simu nafatin presepsaun diak  atu hahú pájina foun ho presepsaun komún ba oin.

“Ita husi ohin bá oin, ami na’in-rua Oé-Cusse oan, mesak jerasaun foun, ita konsidera ita-nia aman sira husi Primeiru-Ministru Kay Rala Xanana Gusmão too avô Rogério Lobato sira, hanesan bee-matan ne’ebé tenke naksulin nafatin bá ita,” Régio da Cruz Salu hateten.

Nia hatutan, prosesu administrativa ho Governu iha país ne’e la’o normál, no iha situasaun ida ne’e hakarak esklarese bá populasaun tomak Oé-Cusse katak iha dalan naruk  atu bele halo Oé-Cusse nu’udár orgullu Estadu no povu Timor-Leste nian.

Prezidente Autoridade foun ne’e subliña liutan katak, reazustamentu institusionál nesesáriu ne’e sempre akontese no ne’e importante, no seidauk ko’alia kona-bá troka António ka José,  maibé ko’alia kona-bá nesesidade.

“Bolu Oé-Cusse oan hotu-hotu,  hamutuk ho lideransa aman nasaun sira ne’ebé agora sira prepara hela estafeta ida ne’ebé tenke lao ho loos no konfiansa,” Régio da Cruz Salu hateten.

Koordenadór ZEEDOA foun, Herculano Sousa hateten, kona-ba tranzisaun ida-ne’e, liu-liu liga bá ZEEDOA nian ne’e,  atu hateten katak durante tinan ida resin serbisu lao hanesan komisaun ezekutivu ida no agradese bá Prezidente Autoridade RAEOA Rogério  Tiago de Fátima Lobato ne’ebé apoiu ho diak no serbisu la’o to’o ohin loron ho diak loos.

“Agora ba oin ita hotu-hotu iha obrigasaun atu la’o tuir polítika koletiva governu nian, no ami nu’udár parte tékniku sei haree liu saida mak ami nia área no responsabilidade. Kontínua nafatin atu kolabora ho parte hotu-hotu, liu-liu autoridade RAEOA,” Herculano Sousa hateten.

Nia hatutan ZEEDOA iha hela faze preparasaun bá enkuadramentu legál sira, ajustamentu bá orsamentu, no buat sira ne’e hetan apoiu másimu husi autoridade sira tanba ne’e agradese bá Prezidente Autoridade sesante Rogério Lobato no sei mellora serbisu sira di’ak liután bá oin.

Reportajen ekipa Rafa.tl